Khliehriat jylliew 14: Ka Jaiñtia Eastern College Khliehriat ha ryngkat ka jingiatreilang bad ka Meghalaya Control Aids Society (MCAS), myn ha ka 12 tarik mynta u bnai jylliew ka la pynlong ïa ka prokram ba kyrpang, ka Red Ribon Club (RRC), Youth Festival kaba don ruh ki kyntien phira “Youth United Against HIV/AIDS & Drug Abuse; Act Now For a Safer Jaintia Hills, u ADC ka East Jaiñtia Hills District, u bah C.Mawkon, MCS u la long kum u kongsan ha kane ka prokram bad ka District TB Officer kaba dei ruh ka District AIDS Control Officer, Jaiñtia Hills, ka Dr P.Lamare ka la long kum ka symbud kongsan.
Kum shibynta ban pynsaphriang ïa ki jingpynshai paidbah halor ka jingshyrkhei ka jingpang AIDS/HIV bad ka jingshyrkhei u drok la pynlong ïa ki prokram bapher bapher ba kynthup ka marathon ha kaba la rah ruh ïa ki baner, ki pla card kiba don ki jingthoh shaphang ka AIDS, HIV bad jingdih drok, la pynlong ruh ïa ka Quiz Competetion, ka Debate competetion.
Haba kren kum u kongsan, u bah C.Mawkon u la ai khulei ïa ka MACS kaba la pynrung ïa kaba kum kane ka prokram hapoh ki college bad kaba la shim ïa ka synjam ban tehlakam ïa ka HIV, AIDS, u kyntu ïa ki samla bad ïa baroh ba dei ban pynmlien ban long ryntih, ban pynmlien ban leh ïa kaba bha la ha kano kano ka sap ba ngi don bad ka don ruh kawei kaba donkam eh kata ka long ban im namar kaba donkam, shuh shuh, u kyntu ïa ki samla ba kin pynsaphriang ïa ka khubor sha ki ïing ki sem, sha ki paralok bad sha ki para marjan ba ka long kaba donkam ban don ka jingiatreilang ban iakhun pyrshah ïa kane ka jingpang ba shyrkhein ka AIDS, HIV kaba la suh thied ha ka imlang ka sahlang “Ka long kaba sngew kyndit eh ban tip ba ki la bun bha mynta kiba don ïa ka jingpang AIDS bad kiba la shah ktah ha u khniang HIV khamtam ha ka imlang ka sahlang” ong u bah Mawkon.
U kyntu ïa ki samla ba kim dei ban ngop ha kino kino ki jingpynshoi kum ha ki jingdih pynbuaid bad u drok ruh u dei uba lam sha ka jingpang AIDS bad HIV.
Ka Dr P. Lamare, ka la ong ba kaba kum kane ka prokram Youth Festival ka dei kawei na ki prokram ka ban pynsaphriang ïa ka khubor ban iada na ka jingpang AIDS bad HIV bad kane ka jingpang watla ka dei ka jingpang kaba ym lah ban pynkhiah, hynrei ka dei pat ka jingpang kaba lah ban shim ki jingiada, kaba lah ban shim ki lad jingsumar, ka la batai ruh kumno ban lait na ka jingshah ktah na kine ki jingpang bad ong ruh ba katkum ka kaiphot ba ka ioh lum la lap ba ki briew kiba don ïa kane ka jingpang AIDS ki la don mynta haduh 3250 ngut, kito kiba tip ba ka don ha ka High Risk (HIV) ki don haduh 2500 ngut bad kito kiba wan ban dih dawai bad wan test ki don haduh 2153 ngut, ka la kyntu ïa kito kiba tip ba ki don u khñiang jingpang ba kin shimkhia ban wan shim ki lad jingsumar bad dih dawai namar lada dih dawai tikna yn dang ioh hi ïa ka jingkoit bad lada wan sha ki jaka sumar kin ioh ruh ïa ki jingpynshai bad kane kan iarap ruh ban tehlakam ïa ka jingpur u khñiang jingpang sha kiwei.
Kiba la jop ha ka jingmareh marathoh ki kynthup u samla Arwanki Ryngkhlem, na Wapung Higher secondary school, Wapung, uba la ioh ia ka nam lah duh na ki shynrang bad ka samla Thehlut Sana na Good Shepherd Higher secondary school, Lad rymbai ka la rah ia ka nam lah duh na ki kynthei.
Ha ka Quiz Competetion pat ka Government Girls’ Higher secondary school, Jowai ka la rah ia ka nam lahduh ba la mihkhmat da ka samla Sarabethel Pyrtuh bad ka Veryfylyn Niang.
Ha ka Debate Competetion ka Khliehriat Higher secondary school, ka la rah ia ka nam lahduh ba la mihkhmat da ka samla Sakani Siangshai bad u samla Odawanlangki Sutnga na Kiang Nangbah Government College Jowai uba ieng na ka liang ka Motion ha ka debate ne jingiatai nia, la pyniaid ia ka prokram da u Principal jong ka Jaintia Eastern College Khliehriat, u Dr. P.Nongtdu.
