Sa ha Amlarem ai jingkyrshan ki paidbah ïa ka VPP halor ka jingïakhih ïa ka Roster System

0

Jowai, Ïaïong 21: Ka Voice of the People Party (VPP) mynta ka sngi Thohdieng kala hiar sa ha Amlarem West Jaiñtia Hills District ban pynsngewthuh paidbah halor ka rukom bhah kam jong ka sorkar lyngba ka ‘Reservation Policy’ kaba long noh shilliang lada ïanujor hapdeng ki jaitbynriew Garo bad ki Khasi.
Ïa kane ka jingïalang la pynlong ha Enowell Hall, Amlarem ha ka jingdonlang naduh u President ka VPP bah Ardent Miller Basaiawmoit ula ba pynsngew ïa ka nongrim ba ka party ka ïeng kaba long kyrpang na ka bynta ki pait ka Jaitbynriew, la don ruh ka kong Aibandaplin Lyngdoh Nonglait nalor kiwei de ki nongkit kam ba hakhmat jong ka seng VPP.
Na ka liang ki paitbah kiba don da ki spah ngut kila rah ïa ki kti ban ai jingkyrshan ïa ka jingthmu jong kate ka Party VPP halor ka jingïakhih ban pynkylla ïa ka Roster System kaba la pyntreikam ïa ka rukom thung kam thung jam ïa ki samla wadkam.
U bah Ardent ula ong ba kaba nyngkong duh dei ban don ka jingïatylli ha ka ktien ka thylliej ban wanrah ïa kawei ka jaitbynriew khnang ban yn lah ban ïakhun nangne shakhmat ïa ki jingïakhih. U la pynsngew ruh ha ka synshar khaddar ka donkam ban wanrah ïa ka jingkhuid jingsuba.
Shuh shuh ula ong ba ka por mynta kala dawa ban pynthymmai noh ïa ka rukom thung kam thung jam halor ka Reservation Policy hapoh ka jylla bad mynta la ïohi naduh ba la pyntreikam da ka Roster System kiba bun hi ka rukom thung kam ka leit sha ki jait bynriew Garo ban pyndap ïa ka bhah jong ki kaba sah.
Ula ong ruh myn ha kane ka Election ba la dep la dei ban ïoh noh ïa ka sorkar jong ka seng riewlum hynrei ki don pat kiba shet kylla bad kiba la leit ban sdien bus ban ai jingkyrshan ïa ki Party National.
Ha kane ka sngi ula pynpaw ka jingsngewkmen ban ïohi ïa ki paidbah nongshong shnong jong ka thaiñ War Jaiñtia jong ka 7-Amlarem Constituency kiba la mih shakhmat ban pyndap ïa katei ka Hall bad ban ai jingkyrshah ïa kane ka jingïakhih ban pynthymmai ïa ka rukom thung kam thung jam ïa ki samla wadkam hapoh ka jylla.
Ula ong ba ka VPP kala ïoh ïa ka jingithuh da ka Election Commission of India ba kala long ka State Party da kaba ula kular ba kan long ka seng riewlum kaba paka ym tang ban jop Election hynrei ban peit ïa ka eh ka shon jong ka Jaitbynriew.
Hadien kane ka jingïalang ka Party VPP (Voice of People Party) kala ïoh ban jied ïa ki nongkitkam ba pura jong ka Party na ka bynta ka 7-Amlarem Constituency kiba kynthup ïa u President- Jamshaphrang Pohtam, Vice President – Isaak Shylla, General Secretary – Rijied Lamin bad kiwei kiwei ki nongkitkam.

Leave A Reply

Your email address will not be published.