Nongpoh, Ïaiong 21: Hadien ka jing ïaid shaphrang bad ka jingïaid beit jong ka lympung ïalehkai sports ba 3 sngi kynthih ki khynnah skul bala tip kum ka Chief Minister Inter School Athletic Meet 2023 bala pynlong da ka ophis u District Sports Officer, Ri-Bhoi District, katei ka lympung kala poi noh sha kaba kut mynta ka sngi hadien ba 32 tylli ki kynhun kila wan ban shim bynta shitrhem ha katei ka lympung bala pynlong ha madan Kurkalang, Bhoirymbong haki jingïalehkai bapher bapher.
Ïa katei ka lympung ïalehkai sports ki khynnah skul ka Ri-Bhoi la wan ban pynhap pyrda noh ïaka da u Bah Rangkynsai Kharbuki MDC ka Umroi Constituency kum u kongsan haka jingdon ryngkat ka kong Paidolyne L. Nonglait District School Education Officer, u DSO ka Ri Bhoi U Bah Boby Nongbet u BDO Bhoirymbong u Bah P. Mukhim u Bah S.T Rympei Rangbah Shnong Lumdaitkhla, Bhoirymbong, ki Nonghikai lem bad ki khynnah skul lem kiba la wan ban ai jingkyrshan ïaki rang bad thei ïalehkai kiba la leit ban mihkhmat naki skul jong ki.
Naka liang ka ophis u DSO kala sam ruh ïaki khusnam ha katei ka sngi ba kynthup ïaka Best Team haka kyrdan Under-14 ki kynthei la rah da ka St. John Secondary School, Jyntru bad haka liang ki shynrang la rah da ka St.Alfred’s Secondary School Marngar, haka kyrdan U-16 pat haka liang ki kynthei la rah da ka Raid Nongbri Secondary School, Umsaw Nongbri bad ka St. Paul’s Higher Secondary School, Nongpoh haka liang ki shynrang, katba haka U-18 pat la rah da ka St. Alfred Secondary School Marngar haka liang ki kynthei bad ka St. Joseph Secondary School Umden haka liang ki shynrang.
Katba ïaka khusnam lahduh jong ka lympung Chief Minister Inter School Athletic Meet 2023 u DSO ha Ri-Bhoi la rah da ka St. Joseph Secondary School Umden hadien ba kala ioh ban khur haduh 13 tylli ki takma ksiar bala sam ruh ïaka khusnam da u kongsan ha katei ka sngi.
