Nongpoh, Ïaiong 21: Ki khun ki hajar jong ka Raid Nongtung ha Ri-Bhoi mynta ka sngi kila tuid sha Nongbah Ummat ka shnong khappud bad ka Assam haka thaiñ Block II, ban sakhi ïaka tamasa Shad Lakhempong kaba dei ruh ka jingshad lehñiam jong ka Raid Nongtung ba ju pynlong shisien shisnem, hadien ba ïa katei ka jingshad lehñiam la pynsangeh noh shipor namar ka jingwan lyngshop jong ka khlam Covid-19.
Ïa katei ka Shad Lakhempong la pynlong da ka ophis jong u Syiem ka Raid Nongtung, Synjuk ki Rangbah Shnong Border Area bad kumjuh ruh ka seng Ri-Bhoi Youth Federation (RBYF), ha kaba u Bah Bipul Thangkhiew President ba rangbah ka seng RBYF u la long kum u kongsan, haka jingdonlang u Syiem ka Raid Nongtung u Paiem Miwell Shadap, ki longsan mansan jong ka Raid, ki nongïalam ka Synjuk ki Rangbah Shnong, ki dkhot ka RBYF lem bad ki khun ki hajar jong ka Raid Nongtung kiba la wan ban sakhi ïa katei ka shad lehñiam.
Kum ban shu pynpaw ba katei ka jingshad Lakhempong ka dei kaba ju pynlong shisien shisnem ban shim bynta da ki khun ki hajar jong ka Raid Nongtung bala ju pynlong haka taïew ba khatduh u bnai Lber lane ka taiew ba nyngkong u bnai Ïaiong, ha shuwa ba u bynriew ka Raid Nongtung un hiar shaka rep ka riang ban duwai phirat ha u Blei Nongbuh nongthaw ba un ai u symbai ba paka bad ki jingthung jingtep ba kin plung bad san bha, hynrei naki daw bym lah kiar katei ka jingshad kala sdang mynta ka sngi hapdeng ka jingiphuh iphieng ban pynkut pat lashai ka sngi Saitjaiñ.
Lyngba katei ka tamasa bad ka lehñiam, ka pynpaw pyrthei ruh ïaka jingriewspah ka riti dustur bad ka kolshor tynrai jong ka Raid Nongtung, naduh ka bam ka dih tynrai, ki jingshad tynrai bala suid la shor bad buh naduh u mynbarim kiba dang pynneh pynsah bad pynim haduh kine ki sngi.
