Nongpoh, Kyllalyngkot 22: Ryngkat bad ka jylla baroh kawei ka Ri-Bhoi District haka sngi Saitjaiñ ka shim bynta ban rakhe ïaka jingdap 51 snem jong ka jingioh ïaka jylla ba pura haka jingïalang kaba shongkun bala pynlong ha Science Hall.
Ha katei ka sngi la don ryngkat lang naduh u Arpit Upadhyay Deputy Commissioner ka Ri-Bhoi, Bah R Kharbihkhiew ADC, Kong M Kshir ADC Dr. A Sani Assistant Commissioner bad kiwei ki ophisar naki tnad sorkar.
Haba kren ha katei ka sngi naka liang u Deputy Commisioner ka Ri-Bhoi u Arpit Upadhyay u la pynkynmaw kumno ka ri India ka ioh ïa ka jinglaitluid na ka jingsynshar ki phareng bad kumno kla jylla Meghalaya ka ioh ïaka jylla ba pura ha u snem 1972 hadien bala phiah bad ka Assam dei namar ka jinglen lade jong ki kpa tymmen bad ki longshuwa manshuwa kiba la ïakhun dohiap ban ioh ïaka jylla ba pura kaba dei ka jingphohsniew jong ki paidbah ka jylla Meghalaya.
U la ong ruh ba ka jylla Meghalaya mynta kala ïaid lynti kumba 51 snem bad lah ruh ban sakhi shibun ki jingkylla haka liang ka roi ka par naduh ka koit ka khiah, ka pule ka puthi, ka kam jngohkai pyrthei, ka jingthaw ïaki Self Help Group ban ailad ïaki longkmie ba kin sengkam bad ban ïeng hala ki jong ki kjat bad shibun kiwei pat ki jingdonkam ba kum ka jylla ka dang donkam ban kyntiew haki liang baroh kumba la sakhi ba ka jylla Meghalaya ka dei ruh kaba riew spah haka riti ka dustur, ka kolshor tynrai bad donkam ka jingïatreilang jong ki paidbah ban lah ban poi sha ka thong kumba angnud.
La pynphuh pynphieng ruh ha katei ka sngi da ki jingrwai bad shad tynrai bala shim bynta da ki kynhun bad ki khynnah skul bapher bapher.
