Shim smai ki VDP Mawsyntai ban ïada ïa ka shongsuk shnong, kyntu ki pulit ban trei da ka jingkitkhlieh

Nongpoh, Naitung 17: Kum shi bynta ban pynkhlaiñ ïa ka jingïada bad ka shongsuk shongsaiñ hapoh shnong, ka Dorbar Shnong Mawsyntai hynne ka sngi ka la pynlong ïa ka jingpynskhem bad jingpynsmai ïa ki nongkitkam thymmai jong ka Village Defence Party (VDP) ha Ïing Dorbar Hall ka shnong Mawsyntai.
Ïa ka jingpynsmai la pynïaid da u sahep na Nongpoh Police Station, u Bah Kenneth Nongsiej, ha ka jingdonlang ki nongïalam shnong bad ki pulit ka Ri-Bhoi.
Ha kane ka sngi la pynskhem ïa u Bah Finningstar Lyngdoh kum u President bad Bah Danial Robert Sylliang kum u Secretary jong ka VDP Mawsyntai. Nalor kine, la pynsmai ruh ïa 15 ngut ki dkhot, kiba la kular ban trei ryngkat ryngkat ban ïada ïa ka shongsuk, ban peitngor ïa ka jingshngaiñ bad ban ïakhun pyrshah ïa kino kino ki kam sniew kiba lah ban mih hapoh shnong.
La sakhi lang ïa katei ka prokram da u Rangbah Shnong u Bah Elevenson Makdoh, u Secretary Shnong Bah Arun Lyngdoh, bad kiwei pat ki riew rangbah ka shnong.
U Bah Kenneth Nongsiej kum uwei naki pulit ophisar u la kyntu ïa ki dkhot jong ka VDP ba kin pyndonkam hok ïa ka jingkitkhlieh ba la bynshet ha ki. U la ong ba ka kam jong ka VDP kam dei tang ban peitngor ïa ka shnong, hynrei ban long ruh ki nongïatreilang bad ki bor Pulit bad ka Dorbar Shnong ha ka ban tehlakam ïa ki kam sniew bad ka shnong suk ki paidbah.
U la ban jur ruh ba ki dkhot VDP kim dei ban pyndonkam bakla ïa ka bor ba la ai ha ki. Lada jia kano kano ka jingjia kaba ïadei bad ka aiñ, ki dei ban pyntip mardor sha ki bor pulit bad ym ban shim ïa ka aiñ ha la ki kti.
Shuh shuh u Bah Kenneth Nongsiej u la kitbok kitrwiang ïa baroh ki nongkitkam thymmai bad u la pynshlur ïa ki ban trei da ka jingkitkhlieh, khnang ba ka VDP Mawsyntai kan long ka jingïarap kaba khlaiñ ban ïada ïa ka shnong bad ban pynthikna ïa ka shongsuk shongsaiñ ha ka thaiñ.