Nongpoh, K’Lyngkot 25: Ki khun samla kynthei bad shynrang ba kynthup ruh ïaki heprit bad kiba la rangbah mynta ka sngi kila shim bynta shitrhem ha ka jingïakop mareh thong ne ka National Voters Day Run 2024 bala pynlong da ka ophis treikam jong u Sub-Divisional Patharkmah (Civil) Sub-Division, Ri Bhoi District bad ryngkat ka office u Deputy Commissioner, Ri Bhoi District kum ka thong ban pynshlur ïaki samla bad ki paidbah ba kin mih shakhmat ba kin shimbynta ïalade ha ka jingthep vote kum ka hok jong ki ban jied ïaki nongmihkhmat.
Ïa katei ka jingmareh thong la sdang naduh Mynnar Jirang bad pynkut haduh Patharkhmah Government Higher Secondary School, ha kaba u Bah MB Tongper Sub-Divisional Officer ka Patharkhmah (Civil) Sub-Division u la leit ban shim bynta kum u kongsan ha ka jingdonlang u PR Hajong BDO ka Jirang C&RD Block, ki ophisar naka tnad ïalehkai sports, bad kiwei kiwei ki riew rangbah naka thaiñ Patharkhmah.
Hadien ka jingïamareh naka liang ka ophis u Sub-Divisional Patharkmah (Civil) Sub-Division kala sam ruh da ki EPIC sha kito ki samla kiba dang iohpdiang nyngkong ïaka EPIC bad kumjuh ruh ki khusnam sha ki nongjop ha ka jingïakop mareh marathon.
U Bah MB Tongper kum u kongsan haba kren ha katei ka sngi u la ai ka jingïaroh ïaki samla kiba la wan ban shim bynta shitrhem ha katei ka sngi bad pynshai ruh sha ki halor ka hok thep vote jong ki ba kim dei ban pynsepei ïala ka jong ka hok hynrei ban shim bynta ha man la ki jing thep vote ban jied ïaki nongmihkhmat.
