Nongstoiñ, K’lyngkot 25: Mynta ka sngi ka 25 tarik Kyllalyngkot 2024, ka Election Branch jong ka Ophis u Deputy Commis-sioner, West Khasi Hills District, ryngkat lang bad ka Ri India hi baroh kawei ka la rakhe ïa ka National Voters Day kaba 14 halor ka phang, ‘Ym don da kiwei pat lait na ka jingthep vote, Thikna Ngan vote Beit’.
Ïa kane ka prokram la pynlong ha Trysem Hall, DC Ohis ha kaba u Bah Garod L.S.N Dykes, IAS District Election Officer, West Khasi Hills, District u la long u kongsan, ha ka jingdon ryngkatlang jong u Bah H.K Thabah, MCS ADC (EI), Bah E.Lyngdoh MCS, AC (EI), ki RO, AEROs, EAC in-charge, BLOs, ki Rangbah Shnong, ki khynnah skul, ki nongthep vote kiba pynrung kyrteng thymmai lem bad kiwei kiwei.
U Kongsan u la pynpaw ka jingsngewnguh bad ïaroh ïa kito kiba dang pynrung kyrteng thymmai ïalade na ka bynta ban ïoh ïa ka hok thep vote. U la ai mynsiem ïa ki ba ki dei beit ban thep vote, namar ka dei ka hok jong ki bad ha kajuh ka por kan pynbha ïa ka shynshar khaddar hapoh ka ri.
U la ai ruh ka jingïaroh ïa ka jinglah bad ka jingtrei shitom jong ki nongtrei sorkar, kiba la bynshet ïa ka kamram ban pynrung kyrteng bad ban ïit janai ïa ki jingdonkam baroh, kiba ïadei bad kane ka kam, haduh ba ki la lah syndon ban pynmih ïa thup kyrteng jong ki nongthep vote hapoh jong ka District.
Kiwei pat ki prokram ha kane ka sngi ki khyntup ïa ka jingsam ïa ki EPIC Card, ka jingpynkup burom ïa ki nongthep vote thymmai, ka jingbatai halor ki kor EVM bad VVPAT, ka ïakop thoh Slogan bad ïakop dro jingdro, kumjuh ruh ka jingai khusnam sha ki ki Booth Level Officer (BLO) kiba la trei shitom bad kiba la leh bha. Nangta ka la don ka jingpule jingkular halor ka NVD, ka jingrwai na ka Kids Tarari choir bad ka prokram kyrpang na ka Josephas bad Company.
Ka jingmut bad ka thong jong kane ka prokram ka long, ban pynsngew-thuh halor ka bynta bad ka kamram jong ki nongshong shnong, ha kaba ïadei bad ka jingthep vote bad kumjuh ruh halor ka synshar khaddar paidbah.
