Shillong, Lber 29: Ka kynhun ïalehkai kriket jong ka Langsning Xl ka la khur jingjop hadien ba pynliem da 3 wicket ïa ka Spartan CC hynnin ka sngi ha ka lympung lehkai jong ka Shillong Cricket League kyrdan Super Division 2024.
ïa ka toss la jop da ka Langsning Xl kaba la jied ban bol nyngkong, na ka liang jong ka Spartan ka la lah ban tied 190 ron shuwa ba baroh 10 ngut ki wicket kin shah pynhap hadien 43.3 over.
Napdeng ki rangtied ka Spartan kiba la seisoh ki kynthup ïa u Mani Bhusan (42 ron naki 77 bol) bad u Trinayan Dutta (30 ron naki 49 bol), haba phai pat sha ki rangkawangbol ka liang pyrshah, u Steve Syiemlieh u la pyndep 8.3 over, ailad tang 29 ron bad khur 4 wicket, katba u Riboklang Hynniewta u la kawang 9 over, shah tied 26 ron bad khur 2 wicket.
Haba shimti ban beh ïa ka thong ba la buh, ka Langsning Xl ka la tied tam da 191 ron, shah pynhap 7 wicket naki 41.2 over kaba la biang ïa ka kynhun ban khur ïa ka jingjop da 3 wicket. U Rijied Marbaniang u la khyrwit 46 ron naki 49 bol, katba u Javed Jyrwa u la kamai 33 ron naki 48 bol.
ïa ka nam rangïalehkai ba kynsai tam ha kane ka jingïakhun lane Player of the Match la khur da u Steve syiemlieh u ba la seisoh bha ha ka bol ban khur haduh 4 wicket bad tied 19 ron.
