Shillong, Lber 29: Ki ar tylli ki jingïakhun ka lympung 3rd District League T20 Cricket Tournament 2024 ba la pynïaid da ka East Khasi Hills Cricket Association ba la long hynnin ka Sngi Palei ki la kut ha kaba ki ar kynhun ba kynthup ïa ka Thangsning bad ka Hurdles ki la khur ïa ka jingjop.
Haba phai sha ka jingïalehkai kaba nyngkong, ka Thangsning CC ka la jop da ka said ïa ka Mawphlang CC, kata da tang 1 ron.
Ka Thangsning CC ka la jied ban tied nyngkong hadien ba jop ïa ka toss, bad kane ka kynhun ka la buh ïa ka thong da 116 ron, shah pynhap 5 ngut naki 15 Over. U Briketstar Kharumnuid u la tied 30 ron naki 29 bol, katba u Mawlynnai Kharumnuid rangkawangbol ka liang pyrshah, u la khur 1/19 naki 3 Over.
Haba pyrshang ban beh ïa katei ka thong ba la buh, ka Mawphlang CC ka la duna da tang shi ron ban ïakhaid hadien ba tied 115 ron, shah pynhap 9 ngut shuwa ban kut ka 15 Over.
Na ka liang jong u Pynshongdor u la lah ban ïarap 30 ron (24) hynrei kane kam pat shym la lah ban pyllait ïa ka kynhun na ka namrem.
U Kitlyngkor Nongkhlaw rangkawangbol ka Thangsning u la ïoh ban khur 4/12 naki 3 over bad ban khur syndon ïa ka nam Player of the Match kaba la ïarap ïa ka kynhun ban jop ïa ka jingïalehkai da shi ron.
Haba phai sha ka jingïalehkai kaba ar, ka kynhun Hurdles CC ka la jop suk ïa ka Thynroit CC da 9 wicket. Ha ka jingkynting (Toss) la jop da ka Hurdles CC, kaba la jied ban bol nyngkong.
Haba shimti ban tied nyngkong, ka kynhun Thynroit CC ka la ïohlad ban kamai tang 51 ron hadien ba baroh 10 ngut ki rangtied ka kynhun ki la shah pynkhyllem noh tang hadien ba la ïaid 15.2 Over. Dei tang u Mandari Dkhar u ba la kynjoh sha ka phew ron, kata da 12 ron naki 31 bol.
U Shrimonto Hajong, rangkawangbol ka kynhun Hurdles CC u la ïoh ban khur haduh 4 wicket da kaba ailad tang 7 ron ban shah tied naki 4 Over.
Ka Hurdles CC ka donkam tang 5 over ban tied pyndep ïa ka 52 ron bad shah pynhap tang uwei . U Sandy Kharshandi u la tied 22 ron naki 14 bol. Dei tang u Osric Herbert Wanswett u ba la ïoh ban khur wicket (1/38 naki 3 Over) napdeng ki rangkawangbol ka Thynroit.
Ka Hurdles CC ka la khur ïa ka jingjop kaba suk da 9 wicket bad ïa ka nam Player of the Match la khur da u Shrimonto Hajong, u ba la pynkhyllem saw ngut ha ka bol na bynta ka kynhun.
