Shillong, Kyllalongkot 31: Ki ar tylli ki jingïakhun jong ka lympung Shillong Cricket League 3rd division kiba la long hynne ka sngi ki la jam sha kaba kut ha kaba ka Nongpdeng bad ka Jersey Kings ki la khur jingjop.
Na ka liang jong ka Nongpdeng ka la pynliem ïa ka Metallica ha ka jingïakhun kaba nyngkong da 3 wicket. Ka jingïakhun ka la sdang ha kaba ka Metallica ka la jied ban tied nyngkong hadien ba jop ïa ka toss.
Ka Metallica ka la lah ban kynjoh sha ka 141 ron shuwa ba baroh 10 ngut kin shah pynhap noh ha ka 17.4 over. U Kalyan Barua u la tied 33 ron naki 22 bol, katba u Ashish Gurung u la kamai 23 ron naki13 bol.
Napdeng ki rangkawangbol kiba la seisoh na ka liang pyrshah ki kynthup ïa u Donbok Hujon (3 over: shah tied 20 ron: khur 2 wicket) bad u Wanbor Lamare (over: shah tied 26 ron: khur 2 wicket).
Ka Nongpdeng ka la lah ban tied 142 ron shuwa ban kut ka 20 over, shah pynhap 7 wicket. U Maitshaphrang Khongjee u la kamai 34 ron naki 21 bol katba u Damonlang Sun u la tied 29 ron naki 35 bol, bad ïa ka nam Man of the match la khur da u Robert June Nongsiej u ba la tied 17 ron bad khur 1wicket.
Haba phai sha ka jingïakhun kaba ar hapdeng ka Slog warriors pyrshah ïa ka Jersey Kings CC, la tied nyngkong da ka Slog Warriors bad buh ïa ka thong da 125 ron shah pynhap 9 ngut haduh kaba kut ka 20 over.
U Subhakar turha u la khyrwit 56 ron naki 45 bol, katba u Rakesh Raj u la tied 20 ron naki 19 bol. Napdeng ki rangkawangbol ka liang pyrshah, u Vishal Sunar u la khur 2 wicket na ki 3 over, katba u Vivek Sunar u la khur 2 wicket naki 4 over.
Haba beh ïa ka thong ba la buh ka Jersey kings ka la pyndep tang hapoh 13.4 over ban tied 126 ron shah pynhap tang 2 ngut ban jop da 8 wicket.
U Raj biswas u la tied 25 ron naki 19 bol, hynrei ka namtam ka long ïa u Bicky Raj Das u ba la khyrwit 77 ron naki 31 bol bad khur syndon ïa ka nam Player off the match.
