Mawkyrwat, Ïaïong 25: Ka ophis jong ka Krishi Vigyan Kendra (KVK), West Khasi Hills District ka la pynlong ïa ka jingai jinghikai bad ka awareness prokram halor ka jingpyndonkam ha kane ka juk bad ki jinglehkhuid leh suba ne “One day training and awareness programme on techniques and hygienic practices” kiba dei bad ki nongshoh doh ne ot-doh ha ka 11 tarik Ïaiong, 2023 ha ka ophis treikam jong ka Krishi Vigyan Kendra, West Khasi Hills, Nongshillong.
Ïa kane ka prokram la buh beit da ka Division of Animal & Fisheries Sciences, ICAR Research Complex for NEH, Umiam bad la bei tyngka da ka ST Component (mynshwa TSP), ICAR RC NEH Umiam ryngkat ka jingïatreilang jong ka Krishi Vigyan Kendra, Ri-Bhoi bad West Khasi Hills.
Ha kane ka prokram la shimbynta da 30 ngut ki nongïashimbynta ba kynthup ïa ki nongot-doh bad kito kiba trei ba ktah ha kane ka kam. Ka wan ai jinghikai kiba tbit ba kynthup ïa u Dr. Samir Das, Senior Scientist, u Dr. A.A. Prince Milton, Scientist, ICAR RC NEH bad u bah Bankit K. Mukhim SMS (Fisheries), Krishi Vigyan Kendra, Ri-Bhoi ki la don ha kane ka prokram ha kaba ki la sam lang ïa ki symboh jingmut lyngba ka jingnang jingtip bad jingshemphang jong ki halor ka rukom bakhuid bad suba ha ka kam ot doh bad kiba trei ba ktah ha kane ka jait kam.
Ka kong Lakyntiew Warjri, Senior Scientist & Head of KVK, West Khasi Hills ka lah ai ka jingkren lyngkot bad jingpdiang sngewbha ïa ki nongkren kiba dei na ka Animal Health Division, ICAR RC NEH, Umiam bad ka jingnoh synñiang jong ki da kaba ai jinghikai halor ki lad bad ki rukom ba khuid bad suba, ka ba lam sha ka jingïada ïa ka koit ka khiah jong ki nongot-doh, ki dkhot jong ki longïing jong ki bad kumjuh ïa kinongthied.
U Dr. Samir Das u la ai ïa ka jingkren lyngkot halor ka prokram ha kaba la sam ruh ïa ki kynja tiar ban ot-doh ne ki meat handlers kit kiba kynthup lang ïa ki tiar ki tar bad ki jingdonkam na ka bynta kito kiba trei ba ktah ha kane ka kam kaka shongdor kumba T. 10,000/- tyngka.
La don ruh ka jingïamir jingmut bad jingïatai nia ha kaba la ai jingkren da u Dr. A.A.P. Milton bad u la ong ba ki nongot-doh bad kito kiba trei kine ki jait kam ki long nongtrei kiba kor ha ka bynta ban pynïoh bam ïa ki paidbah. Ka jingtrei ba man la ka sngi pat ha kane ka kam ha teng ka lah pat ban wanrah ïa ki jingpang kiba pur na ki mrad sha u briew. Kumta, ka donkam ban bud ïa ki lad ki rukom ba suba ban lait na kum kita ki khep.
Ha ka jingpyni lyngba ka presentation, u Dr. A.A.P. Milton u la batai ïa ki rukom ba khuid bad suba ba ju bud ha ki karkhana ot-doh kiba ïa dei bad ka juk thymmai. Ha kaba pynkut ïa ka jingpyni jong u, u la batai khyndiat shaphang ki tiar kiba don hapoh ka kit bad ka jingpyndonkam ïa ki.
Ha kajuh ka por u la kyntu na ka bynta ki nongshimbynta ba ki dei ban pyndonkam hok ïa kane ka kit ba la sam sha ki, khnang ban pynmih ïa ka doh ba suba bad ba bha, ban kham lah pynïaid ïew ha ka dor ba kham heh bad kin long ka nuksa babha ïa kiwei pat ki para nongot doh.
