Nongstoiñ, Ïaiong 25: Ka jingjyllei jong ki nongtuh ha sor Nongstoiñ ka la palat liam bad ka la nang jur, ha kaba dang tang ha kane ka taïew kaba dang shu dep haduh 5 tylli ki jingshah tuh ki la jia.
Kawei ka dei kaba la jia ïa ki 3 tylli ki dukan ha ka shnong Siejlieh, kynthup ïa ka dukan jong u bah Jim Reaves Ïawphñiaw, ha kawei na ki kyntoid shnong kaba la tip kum ka Mawïaban, kaba la shah pied ïa ka dukan heh kaba don ha surok bah bad ki nongtuh ki la rah shibun ki tiar ki tar.
Ha ka sngi ba bud la shah pied sa ka dukan ka kong Ebankmen Marbaniang. Hadien kata dei sa ha ka sngi thohdieng la shah rah shisyndon ïa ka safe ne synduk pisa jong ka kong A.Kharsyntiew na ïing sah jong ka. La ong ba katei ka jingjia la antad ba ka la jia ha ka por 4 baje ei ei janmied jong ka sngi thohdieng.
Ka kong A.Kharsyntiew ka la ong ba kino kino kiba lah ban ai jingtip ïa ki nongtuh kiba donkti ha kitei ki kam runar yn ai khusnam ha kaba heh. Kumban shu pyntip ba kitei ki jingshah tuh ne shah pied ki dukan ki la jia ter ter naduh ka 19 tarik 20 bad 21 tarik u Ïaïong mynta u bnai.
