Plie Bishop Wilbert Marweiñ ïa ka (FARM) Northeast IV

Nongstoiñ, Ïaiong 25: Kum shi bynta ban rakhe ïa u snem kyrpang jong u ‘Krai’ bad ban plie pyrda ïa ka Project FARM NE IV, mynta ka sngi ka seng trei mon sngewbha kaba la tip kum ka Nongstoiñ Social Service Society, ka la pynlong ïa ka jingïalang paibah bad ki nongrep jong ka thaiñ hapoh ka hall jong ka Nongstoiñ Social Service Society, Tiehsaw Nongstoiñ.
Ha katei ka sngi la hikai ruh sha ki nongrep ba kin tip kumno ban tyngkai ïa u ‘Krai’. La ong ba utei u jingthung u dei uwei na ki jingbam u ba kynsai tam na ka bynta u khun bynriew, khamtam eh ïa ka koit ka khiah namar u ïarap shibun ïa kiba pang shini, kiba don blood pressure bad kiwei kiwei.
Ha kajuh ka por la plie pyrda ïa ka Project kaba la tip kum ka ‘Facilitating Agricultural Resilient Measures (FARM) Northeast IV, kaba la kyrshan da ka Misereor Germany lyngba ka Caritas India.
Ha kaba ïadei bad kane, na ka liang u Kongsan u Most Rev. Wilbert Marweiñ, Bishop ka Nongstoiñ Diocese u la plie paidbah ha ryngkat ka jingïasynranlang u bah V.Swer MCS Additional Deputy Commissioner ka West Khasi Hills District kum u symbud kongsan, I Dr.Lakyntiew Warjri Senior Scientist & Head KVK, I kong Philakyntiew Nongkynrih DDM NABARD, I kong C.Pathaw District Agriculture Officer Nongstoiñ.
Kiwei pat ki kynthup u Phadar Rolandus Lyngdoh President Nongstoiñ Social Service Society, u Phadar James Anderson Syiemlieh u Director ka Nongstoiñ Social Service Society, u Fr. Ditendar Lyngkhoi Assistant Director ka Nongstoiñ Social Service Society bad kiwei kiwei ki riew rangbah jong ka thaiñ kumjuh ruh ki nongrep. Kum ka dak jong ka jingrakhe ïa katei ka sngi kyrpang u kongsan u la ïoh ruh ban ot ïa u cake ba la shet da u Krai.