Kyrpad u trai jaka ïa u MLA ban tuklar lem ba sahkut ka jingpyntrei ïa ka Polytechnic

Nongstoiñ, Ïaiong, 25: Ka jingpyntrei ïa ka skul pule lane Polytechnic kaba don ha shnong Mawrusyiar Nongstoiñ, ka la shu sahkut noh mynta la jan dap lai snem, na ka daw ka jingleh sting ka sorkar ban siew thikna sha ki Contractor kiba pyntrei ïa ka building jong katei ka skul pule.
U Bah S.Phrelington Dkhar u ba long u sordar Shnong barim ka Mawrusyiar, u ba dei ruh u rangbah ba la ai sngew bha ïa katei ka jaka sha ka sorkar, haba ïakren bad u nongthoh khubor mynta ka sngi, u la pynpaw ka jingdiaw mynsiem haduh katta katta namar kane ka kam la shu sahkut sah khlem don shuh kiba shimkhia. U U la ong ba haba u la pyrshang ban wad ïa ki Contractor kiba pyntrei um shem lynti satia shano ki don, namar ki la shu sngap beit kumto khle, wan mih shuh sha katei ka jaka.
“Naduh u snem 2020 ki ar ngut ki contractor kiba pyntrei ïa katei ka building, ki la sangeh bad katkum ka jingïoh jingtip jong nga, na ka liang ka sorkar ka khlem siew thikna ïa ka pisa sha ki. Imat dei na kane ka daw kim wan mih shuh syndon bad lyngngoh ruh ba balei ka tnad ba dei peit kam shimkhia halor kane ka kam”, u la ong.
U la pynkynmaw ruh da kaba ong, “Nga kynmaw ba na ka 8 klur 6 lak tam ka mang tyngka ba la mang ban tei ïa katei ka skul pule, ki contractor ki la nang sei na pla mar ar klur ban shna ïa ka building bad ka sorkar pat ka la shu nang siew ïa ka running bill sha ki kaba long tang mar 40 lak” bad bynrap, “Hadien ka khang dam ha u snem 2020 ki nongtrei ki la sangeh noh haduh mynta bad ym shim la ïohi dak ei ei shuh ba ki Contractor kin sdang biang ïa ka kam”.
“Ha ka jingshisha ka jingtrei ïa ki building ka la long haduh 85 % ei ei ba la lah ban pyndep. Kaba dang sah ka long satang ban pynbit pynbiang ïa ki jingdonkam. Nangta ka bording, ka um bad ka surok, lait nangta jan baroh hi ki kam ki la jan dep lut. Tangba la shu ieh kumto khlem lah pyndep shuh sa ka bynta kaba dang sah”.
U la ong ruh, “Ka jingsangeh ka lah ban dei na ka khang dam namar ki nongtrei ruh ki dei kiba na shabar ka Nongstoiñ. Hynrei u ong ba ka daw ba kongsan hi ka dei ka jingleh sting ka sorkar ban siew thikna. Namar ban ai daw ïa ki misteri ruh ka long kaba bym shong nia, namar ka sorkar hi ka la dep ban pynbna ban sdang ïa ki kam ki jam kumba dei ban long bad jingbthah jong ka sorkar”.
Lah ban pynpaw hangne ba kane ka jingthmu ban tei ïa kane ka skul pule ka dei naduh ka por jong ka sorkar Congress. Hadien ba ka sorkar ka la wad jaka ban tei ïa ka ha kane ka District, na ka liang ka tnad ba dei peit ka la wad jaka kylleng ki shnong ka thaiñ Nongstoiñ.
Hynrei, na ka liang u bah Phrelington Dkhar Sordar jong ka shnong Mawrusyiar, u la ai sngew bha ïa ka jaka ha u snem 2013 da ka jingïa soi soskular ba ka ka tnad ba dei peit kan pynrung kam ïa kiba haïing hasem jong ki trai khyndew. Ha katei ka juh ka snem la lah ban pyndep ruh ïa ka survey.
Ha u 2014 hadien ka jingmynjur naduh ki bor sorkar, u la lum ïa ka dorbar bad hadien ba la mynjur lang ryngkat bad ka tnad revenue, la pynskhem ïa katei ka jaka ban tei ïa ka Polytechnic. Ka sorkar jylla ha katei ka por ka la mynjur ban mang tyngka haduh 8 klur tam. La khot ïa ka tender bad la aiti sha ki ar ngut ki contractor bad la sdang pyntrei ïa ka jingtrei naduh u snem 2019.
“Kum u nongïalam shnong, nga don ka jingsngewdiaw ba kane ka kam ka la shu sahteng noh kumne. Naduh u snem 2020 haduh mynta ym shym la don shuh mano mano na ki Contractor ban wan trei pyndep. Hooid ym lah ban len ka don ka jingkhang dam namar ka khlam. Hynrei, na ka liang ka sorkar ka la dei ban shimkhia bad peit bniah biang ïa kane ka bynta ba kongsan, da kaba kan peit ba ki kam ki jam kiba ïadei bad ki Contractor, khnang ba ka kam kan ïaid beit bad ryntih”, ong u Bah Phrelington Dkhar.
“Ngi la ai sngewbha ïa kane ka jaka da ka jingthmu ba kan long ka jingkyrkhu ïa ki samla pule jong ka dong ka thaiñ bad jong ka Jylla hi. Kumta ngim kwah ba kan shu kut noh tang kumne, hynrei ngi angnud ba ka kam kan ïaid beit shakhmat haduh ban da lah ban pyndep kumba la thmu. Kum u trai jaka ba la ai sngewbha ka khyndew, nga don ka bynta ban kyntu sha ki bor ba dei peit bad khamtam eh ïa ka sorkar, ba ka dei ban shimkhia ïa kane ka bynta”, u la ong.
“Nga sngew dei ban kyntu khamtam eh sha u MLA ba mynta u Bah Gabriel Wahlang u ba dei ruh na ka seng Congress, ban thaw ki lad ki lynti ban pyndep noh ïa ki jingdonkam baroh, na ka bynta ka jingmyntoi jong ki samla ka District jong ngi”, ong u Bah Phrelington Dkhar.