Khliehriat, ïaiong 25 : Ki dkhot bad ki nongïalam jong ka Khasi Students Union East Jaiñtia Hills District, hynnin ka sngi ki la leit sngewlem bad ïakynduh ïa ki lanot pluh ïing ha shnong Moolamylliang, ha kajuh ka por ka seng ka la theh jingïarap sha katei ka long ïing.
Kum ban shu pynkynmaw, katei ka long ïing ha shnong Moola mylliang, ka la ngat ha ka apot jingpluh ïing kaba la jia myn ha ka 23 tarik mynta u bnai, ha ka por shiteng synia ha kaba ka ding ka la bam duh lut ploiñ ïa baroh ki jingdon jingem kiba don hapoh ïing, kynthup naduh ki jaiñ, ki nep, ki tiar ïing bad baroh bad ym shym la don kano kano ka jingduh ka jingim briew ha kane ka jingjia.
Na ka liang ka Seng ka la kyntu jur ïa ki bor sorkar ruh ba kin ai ka jingïarap lem kaba kham kloi ïa kane kalongïing.
Ha katei ka jingleit jngoh sngewlem ki nongïalam bad ki dkhot jong ka seng, la lam khmat da u Finance Secretary KSU East Jaiñtia Hills District, u bah Shaniahskhem Dkhar, Sport Secretary, u samla Shwari Ryngkhlem, u Sport Secretary jong ka KSU Wapung Unit.
