Shillong, Nailur 04: Ka Seng VPP ka la ong ba ka jingaipor ka sorkar ïa ka Expert Committee ba kan review ne pynthymmai ïa ka Reservation Policy, ka la slem palat bad la kumno kumno tang hynriew bnai ba la biang.
Ïa kane la pynpaw da ka Seng ha ka jingleit ïakynduh ïa u Myntri Rangbah u Conrad Sangma mynta ka sngi. Ka Seng ha ka jingïalam u Dr. Ricky AJ Syngkon ryngkat ka jingsynran u MLA Mawlai bad Mawryngkneng bad kiwei de ki nongïalam, ki la leit ai da ka jingthoh ha u Myntri Rangbah ban pynpaw ka jingai khublei namar ba ka sorkar ka la burom ïa ka jingdawa ka Seng ban thung da ka Expert Committee ka ban peit bniah ïa ka jingpynkylla ïa ka Reservation Policy.
Ha kajuh ka por ka ai ka jingkitbor kit rwiang ruh ïa ki dkhot kane ka Komiti ryngkat bad ka jingkhmih lynti ba kin lah ban wanrah ïa ka jingpynkylla kaban pynhun lang bad warah ka jingïamonlang hapdeng ki jaidbynriew Khasi bad Garo.
Ka Seng ka kyntu ruh ïa u Myntri Rangbah ban pynkylla noh ïa ka rai ban aipor shi snem ïa kane ka Expert Committee da kaba pynlyngkot noh sha ka hynriew bnai.
