Shillong, Nailur 04 : Ka Khasi Students Union (KSU) mynta ka Lah Sngi U Blei, kala dawa ïa ka sorkar ban pynduh noh mardor ïa ka bhah pule MBBS jong palat 10 ngut ki samla ba la shah jied na ka Open Category ka State Quota (bhah ka Jylla) namar ba kim shym la lah ban pynbiang ïa ka Permanent Residential Certificate (PRC).
Ha ka shithi ba la aiti sha u Myntri Rangbah ka Jylla Conrad K Sangma bad Myntri ka Koit ka Khiah Kong Ampareen Lyngdoh, u President ka KSU samla Lambokstar Marngar ula ong ba 10 ngut ki samla pule kim shym la pynbiang ïa ki kot ki sla ba donkam kat kum ka jingbthah jong ka DHS.
Ula ong ba ka jingbym don ïa ka PRC kum kawei na ki kot ki sla ba donkam kat kum ki kyndon ha ka Advertisement ka la khring ba dei ban pynduh noh ïa kine ki samla ban ïoh ïa ka bhah haba bynrap ba ki Birth Certificate ba la aiti ruh ki dei ki bym don ïa ki Serial Number bad ka hukum ka Iing Bishar ka dei ba hap ban tohkit bniah ba kumno la ai ïa kine ki kot ki sla da ki bor ba dei khmih.
“Ka KSU ka dawa ban pynduh noh mardor ïa palat 10 ngut ki samla ban ïoh ïa ka bhah pule MBBS naka thup Open Category bad ha ka jaka jong ki, ki samla kiba dei hok, ki dei ban shah kynthup noh. Ka Union ka kyrmen ba ka Sorkar kan shim ïa ki sienjam ba donkam ka ban pynthikna ba ki samla pule ba dei hok jong ka Jylla kin ym shah pynduh ïa la ka hok bad ki samla ki bym tip ki dei kiba naei, ki dei ban shah pynsajia kat kum ka aiñ” pynpaw u samla Lambok.
Ka shithi ka pynpaw ba u Mehbub Hassan u khlem pynbiang ïa ka PRC hynrei ula aiti pynban da ka Provisional PRC kaba la ai sha u ha ka 7 tarik Jylliew 2023 ha Dadenggre bad kaba treikam tang 12 bnai. ïa une u samla la kha ha u snem 2001 bad ka Birth Certificate ka dei kaba la ai ha u 2019, ka bym don satia ïa u serial number bad ka hukum ka Iing Bishar ne affidavit ban pynthikna ïa ka.
“U Monimul Ekram Mandal : U khlem aiti ïa ka Birth Certificate. La aiti da ka PPRC kaba treikam tang 3 bnai . Ym shym la aiti ïa ka PRC” la pynpaw.
Kumjuh ruh u Ayush Kumar ula ai tang ka Birth Certificate ba na Bihar khlem ka hukum(affidavit) ka Iing Bishar, ki kot ki sla ka CBSE na Rajasthan bad ka PRC na East Jaintia Hills.
U Md Mahmadul Islam: U la ai tang ka Birth Certificate ba la ai ha u 2022 watla ïa une u briew la kha ha u snem ba bud kata ha u 2003. Um shym la ai ïa ka PRC hynrei da ka PPRC na West Garo Hills kaba treikam tang 12 bnai.
U Atifa Zaman: Um shym la ai ïa ka Birth Certificate ne PRC hynrei la aiti da ka PPRC na West Garo Hills kaba treikam tang 12 bnai.
U Chiranjit Kumar Paul u la ai ïa ka Birth Certificate ba la ai sha u ha u 2008 watla ïa une u briew la kha ha u 2005. Hynrei hangne ruh ym shym la don ka hukum ka ïing Bishar. Une ruh u khlem ai ïa ka PRC hynrei da ka PPRC kaba treikam 12 bnai.
Ka Deeya Choudhary: La aiti ïa ka PRC hynrei khlem ai ïa ka Birth Certificate. Donkam ban hap pynthikna ïa ka jaka sah bad ka sngi kha jong kane ka samla.
U Angoor Zaman Hoque u la ai ïa ka Birth Certificate bym don ïa ka hukum ka Iing Bishar bad ka serial number. Ym don PRC hynrei tang ka PPRC na West Garo Hills kaba treikam tang 12 bnai.
U Abdul Kalam Golam Mahdi Alom: Ka Birth Certificate kaba la ai ha u snem 2014 hadien 12 snem ba kha ïa u bad ka bym don satia ïa ka hukum ka Iing Bishar bad ka serial number. Ym don PRC hynrei da ka PPRC bala ai ha ka 16 tarik Jymmang, 2023 kaba treikam tang 3 bnai.
U Habibur Rehman: U samla uba mih kyrteng ha ka Waiting List jong ka Open Category u khlem ai ïa ka PRC hynrei ula ai da ka PPRC kaba treikam tang 12 bnai. Ym shym la batai ruh ïa ka jaka ba kha ïa u.
