Sheptieng ki nongshong shnong lada shah ñiat ka shnong Lyngkhong sha Bangladesh
- Thoh ka KSU sha ka DC ba ïoh bailutksan duna ki trai jaka--
Shillong, Risaw, 27: Ki paidbah nongshong shnong jong ka shnong Lyngkhong, kaba hap ha ka Raid Lyngkhat, Hima Khyrim ki im hapdeng ka jingsyier mynsiem ïohba ka jingker sainar shiah hapdeng ka ri India bad ka Bangladesh kan pynlong ïa ka shnong Lyngkhong ban shah khynñiat jubor sha ka ri Bangladesh.
Ka shnong Lyngkhong ka don ha syndah u mawpud bad la ong ruh ba ka Hat Lyngkhat kaba pawnam bha naduh ka por hyndai mynta ka la khang khyrdep naduh ba wan lynshop ka khlam COVID-19 haduh mynta, watla kane ka iew khappud ka dei u budlum jong ka ïoh ka kot jong ki paibah ka thaiñ Riwar Mihngi kiba ju shalan ïa ki marrep jong ki sha ka ri Bangladesh.
Ha ka dorkhas ba la soi da ka KSU, Nongtyngur Unit, u Rangbah Shnong ka Nongkyndah, ka Shnong Riwai, ka shnong Nongtyngur, ka shnong Lyngkhong ki la kyrpad ïa ka Deputy Commissioner jong ka East Khasi Hills District ba kan tuklar lem halor ka jingïoh duna shaba palat ka bailutksan ba la siew da ka Sorkar sha ki trai khyndew.
Kine ki kynhun ki la pynpaw ba ka jingshim jaka ka dei ban long katkum ki kyndon jong ka Land Acquisition Rehabilitation and Settlement Act, 2013 khnang ban pynthikna ba ki paidbah nongshong shnong kin ym kylla sohpdung na kane ka jingker sainar shiah ha khappud.
Ha kajuh ka por, kine ki kynhun ki la pynpaw ha ka Deputy Commissioner ba kan pynthikna ba ka Hat Lyngkhat kam dei satia ban khang khyrdep na ka daw ka jingpyntreikam ïa ka projek ker sainar shiah namarba kane ka iew khappud ka dei kaba la don haduh hyndai hynthai.
“Lada ka jingpyntreikam ïa ka projek ker sainar kan pynlong ïa ka Hat ban khang dam syndon shi rta, kan wanrah ïa ka jingduhnong kaba khraw haduh katta katta ïa ki paidbah nongshong shnong ha khappud kiba ju shahniah ïa ka khih ka kamai bad ka ïoh ka kot na kane ka iew,” la ong kine ki kynhun.
Ki la kyrpad ruh ïa ka Deputy Commissioner ba kan wad da kiwei pat ki lynti lada jia ba kane ka iew khappud kan khang noh tang na ka daw ka jingker sainar shiah ha khappud.
Kine ki kynhun ki la kyntu ruh ïa ka Deputy Commissioner ba kan pyntreikam pura ïa ka Section 14 jong ka Land Acquisition Rehabilitation and Settlement Act, 2013 ha kaba ïadei bad ka jingshim jaka na ka bynta ka jingker sainar.