Ha ka jaka ba 220 Akar yn tei ïa ka Secretariat thymmai, hapoh 2 taïew yn rai ka Sorkar

0

Shillong, Risaw 27: Ka jingthmu jong ka Sorkar Meghalaya Democratic Alliance (MFA) ban pynkynriah noh ïa ka Main Secretariat sha New Shillong ka la nang ïaid namar ba ka sorkar ka la ïoh ïa jaka kaba heh kumba 220 Akar ne kumba 9,58,3200 Square Phut.
Ïa kane la ïathuh da u Myntri Rangbah, u Conrad Sangma uba la leit jngoh ïa kane ka jaka kaba don ha Mawdiangdiang, New Shillong mynta ka sngi ryngkat u Myntri ka tnad Pynroi Sor, u Bah Sniawbhalang Dhar, u Chief Secretary Bah Donald P. Wahlang bad kiwei kiwei de ki ophisar.
Kane ka jaka kadei kaba la shim da ka sorkar naduh ki snem baladep. U Myntri Rangbah u la ïathuh ba nalor ka Main Secretariat yn pynkynriah lang ïa kiwei kiwei de ki ophis sorkar sha katei ka jaka.
“Hadien ba ngi la wan peit ïa kane ka jaka, ngi shem ka long kaba biang bha, namar ba ka heh bad kadei ka jaka ruh kaba dang kham jan na nongbah Shillong bad kane kan pynsuk shibun ïa ki paidbah”, la ong u Conrad.
Ha kajuh ka por, u la ïathuh ba namar ba ha kane ka jingwan peit la lap ba ka jaka ka long kaba biang bha ban tei ïa ka Secretariat ba thymmai, na ka liang ka Sorkar kan sa shong ka jingïalang jong ka Kynhun Myntri ban ïakren bad shim ïa ka rai ban ïaid shakhmat na ka bynta kane ka kam.
Shuh shuh u la ong ba kham hadien pat ka sorkar kan peit ban pynïasoh ïa ka nongbah Shillong bad kane ka jaka lyngba ki surok kali.
Ha kane kajuh ka sngi, u Myntri Rangbah u la leit jngoh ruh ïa ka Shillonbg International Centre for Performing Arts and Culture lane ka Shlem ban pyni ïa ki sap ha ka liang ka Kolshor. Kane ka Centre ka don ha New Shillong bad kadei kaba la tei naduh ka por jong ka sorkar kaba ladep. Kane kadei kaba la pyntrei da ka tnad Arts and Culture ba la bei tyngka da ka Ministry of DoNER lyngba ka North Eastern Council (NEC). Ha kane ka Centre ka don ka Multipurpose Theatre lane ka Hall kaba lah ban pynlong ïa ki Prokram bapher bapher kaba la don ki jaka shong kiba biang bad ka rynsan ruh kaba biang. Kane ka Hall ka ngiam kumba 1739 ngut ki briew ban shong. Ka don ruh ka Stereo Sound bad ka Rotating Stage. Nangta ka don ruh ka Black Box Theatre ne ka Hall ban pyni Cinema ha kaba lah ban pyni ïa ki Phlim. Ka don ka jaka ka shong kaba ngiam 574 ngut. Ka don ruh ka Little Theatre, ha kaba lah ban pynlong ïa ki Drama bad ki jingshad. Ka ngiam kumba 302 ngut ban shong. Kane ka Centre ka don ruh ki jaka shong na ka bynta ki heh ki haiñ.
Ka Video ba la phah da ka ophis jong u Myntri Rangbah, la pyni ba kane ka Centre ka la jan dep artad bad ha man la ki Hall ki don ki light kiba la pyndait itynnad bha.

Leave A Reply

Your email address will not be published.