Shillong, Risaw, 27: Ka Meghalaya Trinamool Congress ha ka sngi Palei ka la kynnoh ba ka Sorkar Meghalaya Democratic Alliance ka la shu leh buittuh ha kaba ïadei bad ka jingpyntrei ïa ka skhim Jal Jeevan Mission ha kane ka jylla.
U Convenor jong ka Meghalaya TMC West Garo Hills District u Richard Mrong Marak u la kynnoh ba kane ka jingleh buittuh jong ka Sorkar MDA ha kaba ïadei bad ka jingpyntreikam ïa ka skhim JJM la lap ha ka shnong Imsamdro, Rongjeng, East Garo Hills District.
Haba kynnoh ïa ka tnat Public Health Engineering (PHE) ba ka shu leh khun jakai ïa ki paidbah, u Richard u la ong, “ki nongshong shnong ym tang ba ki la duh noh ïa ka umbam umdih hynrei wat u Sordar Shnong jong ka shnong Imsamdrop ruh u la teipop ïa ka tnat PHE ba ka la shukor ïa ki ban shu pynngeit jubor ba kane ka projek ka ladep pura. La kynnoh ruh ba ka tnat PHE ka la shu soi thok ïa ka kyrteng jong u President jong ka Village Water Sanctioning Committee.”
U la kynthoh ruh ïa u Myntri jong ka tnat PHE u Bah Renikton Tongkhar da kaba ong, ha ka jaka ban pynshai ïa kane ka jingkynoh, hynrei ula la pynslem pynban ban ai ïa ki daw ba shisha halor kane ka jingkynnoh. U la ong, “ka long kaba sngewsih ban ïohi ba u Myntri un kyndit naba ïoh thiah bad bthah ban ïa kiba pyntrei ïa kane ka projek ban ai kaiphod.
U Marak u la buh jingkylli ruh ïa ka Sorkar MDA da kaba ong, “lada ka Sorkar ka phiel ban pyntreikam ïa ka skhim JJM ha ka shnong kaba don 37 tylli ki longing, kumno kan kynjoh sha ka thong kaba lah ban pyntreikam shi spah na ka shispah ïa kane ka projek ha kaba kut jong u snem 2022. Na ka jinglong jingman kumba ka long mynta, ka paw kumba ka Sorkar MDA ka dang don ha ka jingphohsniew.”
Da ka jingpyntrei kaba dang kot tang 40.63% jong ka JJM projek, ka sorkar ka la shukor ïa ki paidbah ka jylla Meghalaya da kaba shu kular kai ban pynpoi ïa ka umbam umdih sha ki 6 lak tylli ki longing shwa ban kut u snem 2022.
