Ym tang ka pule puthi hynrei ka Mawkynrew ka la kiew ha kiba bun ki liang: Banteidor

Shillong, Risaw 27: U Bah Banteidor Lyngdoh, MLA ka Mawkynrew Constituency bad Myntri ba dei khmih ïa ka tnad Sports ka Sorkar Jylla, u la ong ba ym dei tang ha ka pule puthi ba ka Mawkynrew Constituency ka la kiew hynrei ha kiwei kiwei ki bynta ruh bad kumjuh ruh ha ka kam ïalehkai ha ki bynta jingialehkai bapher bapher ruh ka la kiew bha ha ka thaiñ Mawkynrew.
Haba kren ha ka jingïalang pynkup burom ïa ki samla pule ka Constituency kiba la pass palat 60% na ki eksam SSLC bad HSSLC mynta u snem 2022 ha Good Shepherd Hall, jongka Good Shepherd Higher Secondary School, Jongksha ha ka 27 tarik u Risaw, 2022, kaba la tip kum ka Mawkynrew Academic Excelence Award 2022, u Bah Banteidor u la pynpaw ba ba kane ka jingsam ïakane ka khusnam kam dei ban shu ïa kmen ïa sngewbha bad kam dei ka rongphong shisngi hynrei ka dei ka jingai mynsiem bad kitbok kitrwiang ïa kine ki samla kiba la pass bha shakhmat bad ka long ruh kum ka nuksa na ka bynta ki ban sa wan ki ban ïaleh ïa kine ki eksamin. Kane ka jingpaw jong ki samla pule bad khynnah skul ka dei ka jingsngew sarong ïa u kum u MLA jongki bad ïa ka Constituency hi baroh kawei.
U la ong ba kum u Myntri ha ka Sorkar MDA ba mynta u la wanrah ïa ka Sports Policy bad mynta hi ka Sorkar ka la phai khmat sha ki samla ïalehkai kiba wanrah takma ïa ka Jylla bad ka Ri India da kaba ai khusnam pisa ïa ki.
“Ha kine ki bnai ba la dep ka Sorkar ka la sam khusnam pisa sha bun ngut ki samla ïalehkai kiba la khur takma na ka bynta ka Jylla”, u la ong da kaba bynrap ba ka jingsngew kmen ka long namar kiba ïoh khusnam pisa ki don ruh ki khynnah na ka Constituency. U la ong ba ha ki por ba mynshwa ka tnad Sports kam ithuh ïa ki nongïalehkai kiba wanrah burom. “Bunsien shu ïohi tang ha ki kot khubor ba ki ïoh takma bad ka shu kut noh”, u la ong bad kdew ba mynta pat ka tnad Sports ka la pynlong ka jingai mynsiem ia kiba bun ki samla da kaba ithuh bad ai khusnam iaki
Da kaba kdew ba ka jingtei ïa ka Multi Indoor Complex ba 22 klur tyngka kaba dang ïaid sha khmat ha Jongksha, u la ong ba kane hi kan sei ïa bun ki samla nongïalehkai bapher bapher la ka dei ha ka State, National bad International Level kumjuh.
U la ong ba ha ki 10 snem kiba la leit ka Mawkynrew Block ka la shah kheiñ kaba sahdien tam hynrei mynta ka la kiew sha khmat ha kiba bun ki liang. “Ha ka por ba nga thmu ïakhun ïa ka elekshon nga la bun jingmut tip ngan lah ne em ban trei hynrei ka lad ka plie da ka jingïalam bad don ryngkat U Blei bad ka la long ka jingkyrkhu bad ngan dang ïai pyrshang shuh shuh ban trei bad shakri ban pynpyrnai ïaka Constituency ha ki snem ban sa wan ba kan da long kata ka Constituency kaba paw khmat tam ha ka jylla”, u la ong.
Halor ka kam jngohkai, u la ong ba ka Mawkynrew ka la kiew na ka jingdon ka Laitlum bad Nongjrong. “Kiwei pat ki kam pynroi kum u Myntri ha ka Sorkar nga la pyntuid kumba pyntuid um da u pipe na Secretariat bad kine ki kam pynroi kin dang ïai tuid shuh shuh nangne shakhmat”, u la ong.
Ha kaba ïadei bad kane ka sngi pynkup burom ïa ki samla pule, u la kyntu ïa ki ban long kiba don ïa ka jingtip briew jingtip Blei bad ka akor ka burom. “Kynmaw haba phi leh ïa kano kano ka kam don ia ka jinglong ryntih ban jingtrei shitom bad ka akor ka burom”, u la ong.
Da kaba pynpaw ba ka Good Shepherd Higher Secondary School, Jongksha ka la don ia ka Science Stream, u la ong ba u don ka jingangnud sa ia ka Community College ha ka thaiñ khnang ban long ka jingmyntoi ïa ki samla khamtam kiba wan na ki longïing ba duna ka ïoh ka kot.
Ha ka jingialang la ia donlang bad ai jingkren kil ong u Bah G Dhar, BDO ka Mawkynrew Block, u Dr Shaji ML, Principal ka skul Good Shepherd, ki nongïalam shnong, ki longkmie, ki riewrangbah, ki nongialam ka PDF, ki nonghikai, ki khynnah skul lem ki kmie ki kpa nalor kiwei pat.