Shah kem 3 ngut ki nong Sweden ha Assam ba kynnoh pynkylla Khristan ïa ki paidbah

Shillong, Risaw 27: Lai ngut ki nong Sweden, kiba la wan sha Assam da ka Visa kum ki Tourist ki la shah kem halor ka jingkynnoh ba ki la pynlong jingïaseng ban pynkylla niam Khristan ïa ki paidbah.
Katkum ka khubor ba la muh ha ki Lad Pathaikhubor jong ka Assam, la ong ba kane ka la jia ha Naharkata, Namrup District ha kaba kine ki lai ngut, ka Hannah Mikaela Bloom, ka Susanna Elisabeth Hakanason bad u Marcus Arne Henrik Bloom, ki la ïashim bynta ha ka Jingïaseng United “Peace and Healing Prayer Festival ba la pynlong da ka United Churches Fewllowship bad Bless Assam Network naduh ka 25 haduh ka 27 tarik mynta u bnai.
Ki Pulit ki la kynnoh ba kine ki la pynkheiñ ïa ki kyndon ba la ai ha ka Visa. Katkum ki kyndon ka Visa kine kim lai ban ai kano kano ka jingkren ha kane ka jingïaseng, hynrei la kynnoh ba ki la ai jingkren bad ïalap ban khot ban wer ïa ki briew ban kylla sha ka niam Khristan.
U DSP jong ka Namrup District, ong ki lad pathai khubor, u Naba Kumar Borah, u la ong ba kine ki lai ngut ki la wan sha kane ka jingïaseng bad katkum ki kyndon kim lah ban ai jingkren. Hynrei kine ki la pynkheiñ ïa ka kyndon ba 14 jong ka Foreigners Act. Hadien ba la rejistar Case pyrshah ïa ki la kem bad la rah sha ïingbishar.
Hadien kane ka jingshah kem kine ki lai ngut, da ki spah ngut ki paidbah kiba dei na ki jaka rep slasha, ki la tur sha Thanad ban pyrshah ïa kane ka jingshah kem kine ki lai ngut bad bun ki la pynlong jingduwai hakhmat Thanad.
Ha ka elekshon 2021, u Taranga Gogoi jong ka Seng BJP u la jop na ka Naharkata Constituency kaba dei ka jaka ba bun bha ki nongthep vote na ka niam Khristan.