Shillong, Risaw 27 : U Myntri Rangbah ka jylla u Conrad K Sangma mynta ka sngi Palei u la ïathuh ba baroh ki kaiphod jong ki jingtohkit ba la thung da ka sorkar halor ki jingkynnoh pyrshah ba bun jait ïa ka sorkar MDA ki lap ba ki jingkynnoh baroh kim long kiba shisha.
“ Na ka por sha ka por la mih ki jingkynnoh bad halor kita ki jingkynnoh ka sorkar ka thung beit da ka kynhun ban tohkit ban lap ïa ki jingshisha hynrei haba la dep tohkit bad ai ïa ki kaiphod ki lap ba ki jingkynnoh kim long kiba shisha hynrei la shu kynnoh mata madei ïa ka sorkar MDA” ong u Myntri Rangbah.
U la ong ba ka sorkar kam ju buhrieh ïa ki jingshisha bad khnang ban paw ki jingshisha na kata ka daw haba mih ki jingkynnoh la thung beit da ki jingtohkit bad ïa kane ula pynpaw haba jubab ïa ka jingkynthoh u President ka MPCC u ma Vincent H Pala ïa ka sorkar MDA da kaba ong ba ka dei ka sorkar jong ki jingtohkit tangba ym paw ki jingshisha.
“Nga tharai ka long kaba bha eh ba ngi shim khia bad ngim kdat na ki jingshah kynnoh ban lap ïaki jingshisha. Dei na kata ka daw ngi thung beit da ki jingtohkit ban tohkit la ki jingkynnoh ki long ne em kiba shisha hynrei haba la aiti ïa ki kaiphod jong ki jingtohkit ki paw da kum wei. Nalor katta haba ngi phah tohkit ngim ju shah ba kin pynsuki hynrei ngi ïai bud dien ba ki dei ban pyndep kloi bad kane ka pynpaw ba ka sorkar ka kwah ban pyni ba kam dei ka sorkar kaba kwah ban buhrieh hynrei kaba shai kaba sada hakhmat ki paidbah” ong u Conrad.
“ Ki jingkynnoh kin ïai mih beit bad dei tang da ki jingtohkit kiba lah ban pynshisha bad barobor la thung da ki jingtohkit ba laitluid ban ym don mano mano ba lah ban lushia khnang ba ki jingshisha ki paw. Kumta ki kaiphod jong ki jingtohkit ki lapaw hakhmat ki paidbah bad kane ka pynpaw ba ka sorkar kam don ei ei ban buhrieh nakhmat ki paidbah” ong biang u Myntri Rangbah.
Ula ong lada ym dei ba ka sorkar ka thung da ki jingtohkit ba laitluid katta ki paidbah kin kynnoh ba ka sorkar ka kwah ban buhrieh ei ei shalyndet. Dei na kine ki jingtohkit kiba pynlong ïa ki paidbah ban ngeit bad shaniah ha kane ka sorkar, ong u myntri rangbah.
