Shillong, Lber 13 : U Symbud Myntri Rangbah ka Jylla Bah Prestone Tynsong ha ka sngi Palei u la ong ba ka jingthung kam na ka bynta ki 3000 tylli ki kam kiba lait ha ka tnad Pulit yn sa pyndep noh hapoh u Jylliew mynta u snem.
“Nga kwah ban pyntikna ba ha shwa ban kut u Jylliew mynta u snem, kata ha ka kylla kaba nyngkong jong ka snem Mangtyngka kaban wan nga tikna ba ka jingthung kam yn lah ban pyndep lut,” ong u Symbud Myntri Rangbah haba jubab halor ka cut motion ha Iing Dorbar Thawain ka jylla.
Shuh shuh u la ong ruh ba la bthah ïa ka Recruitment Board ba kan pyndep ïa kane ka kam kham kloi katba lah da kaba buh hakhmat ïa ka jingduna ki nongtrei kaba la ktah ïa ka rukom treikam jong ka tnad pulit ha ka jylla.
Shuh shuh u la ong ruh ba kane ka jingeh kala ktah ruh ïa ka jingpyntreikam ïa ka Meghalaya Residents Safety and Security Act (MRSSA) in the state.
“Ngi don ka jingduna briew bad dei na kata ka daw ngim lah satia ban trei kumba la kdew ha ka Act. Kumta, hadien ba la dep kane ka jingthung kam, ngin sa lah ban pynkhlain shuh shuh ïa baroh ki police station bad ki outpost bad ban pyndep katkum ba la kdew ha ka Act ban pyntikna ba man unongshong shnong ba wan na shabar un hap ban rejistar shwa ïalade. Ka jingpynshisha ruh dei ban pyndep ha kito ki police station, outpost bad kumta ki jingtip baroh dei ban phah sha ki district task committee kiba la thung lypa bad kiba la treikam,” u la ong.
U Symbud Myntri Rangbah u la ong ruh ba ka jingsuki ha ki kam tohkit bad ka jingpynngat kyndon kadei shi bynta jong ka jingduna nongtrei.
Ha kajuh ka por u ong ruh ba ka tnad ka la thoh sha ka transport department halor ka jingdonkam ka jaka kaba kyrpang ha Shillong na ka bynta ban buh ïa ki kali ba aksiden.
“Ngi dang pyrkhat ruh na ka bynta ban don haman la ki distrik bad shen ngin sa shong pyrkhat bad ki district transport officer ban ai jaka,” u la ong.
