Hadien ba la weng ïa ka kyntien pynkha ïa ki land bank, la mynjur ïa ka MSIPF Ammendment Bill

Shillong, Lber 13: Ka Ïingdorbar Thaw Aiñ ka Jylla ha ka sngi Palei ka la mynjur lang ïa ka Meghalaya State Investment Promotion Facilitation (Amendment) Bill, 2025 hadien ka rai jong ka Sorkar ban weng noh ïa ka kyntien pynkha ïa ki land-bank lyngba ka jingthied beit beit ïa ki jaka na ki trai lane kiwei kiwei ki lad.
Ïa kane ka Bill ba la wanrah da u Myntri Rangbah ka Jylla Conrad K Sangma la mynjur da ka jingkyrshan jong ki dkhot na baroh ka Liang Synshar bad Liang Pyrshah, kiba la pdiang bad ïaroh ïa ka jingkloi jong ka Sorkar ban sngap ïa ka sur u paidbah, ha ka sngi kut jong ka dorbar mang tyngka ba 10 sngi ka Ïingdorbar Thaw Aiñ.
Kane ka la wan jia ruh hadien ka jingpyrshah kaba jur na baroh ki liang kynthup ki Sengbhalang. Ka KSU ka la shim wat ïa ka lynti ban tur pyrshah sha Ïingdorbar ban dawa ïa ka Sorkar Jylla ba kan pyndam ïa ka Meghalaya State Investment Promotion & Facilitation (MSPIF) Act, 2024.
Haba wanrah ïa ka Amendment jong ka Bill, u Myntri Rangbah Conrad K Sangma ula ong, “Nga sngew kmen ban pyntip ba ngi la wanrah ïa kane ka Amendment ha kaba ka kyntien ba ong, “Pynkha ïa ki land bank lyngba ka jingthied jaka beit beit na ki trai,” la weng noh khnang ban ai ka khubor kaba shai ba ka Meghalaya Investment Promotion Authority (MPIA) kan nym treikam shuh da ka jingthmu ban pynkha ïa ki land bank bad ai jaka sha ki nongkynshew kam”.
“Kan nym don bynta shuh ha ka jingpynkha ïa ki land bank ne thied pyllang ïa ki jaka lane kano kano ka lynti ban ai pateng lane aiwai ïa ki jaka hynrei kan pynleit jingmut beit tang ha ka ban ïarap wanrah ïa ka jingkynshew kam, ban ai ka rynsan kaba la don lypa, kiba pynaram-baroh kine ki kyndon kin ïaid katkum ka rule jong ka aiñ khnang ban bteng ban wanrah ïa ka rukom treikam kaba biang bad ba dei,” u la bynrap.
“Kane ka pyni ba kane ka Sorkar kam ju leh da ka bor. Kane ka Sorkar kan sngap ïa ka mon bad jingsngewkhia jong u paidbah,” u la ong.
U Conrad ula kular ruh ïa ka ïing ba ka Sorkar kan sa khot ïa baroh ki kynhun bapher bapher kynthup ki seng saiñ pyrthei bad kiwei kiwei ki seng ha ka ban ïakren ïa ki rule bapher bapher ban sa shna khnang ba kin kren ïa ki mat bapher bapher bad ki jingsngewkhia kiba don ha ka aiñ.
U Myntri Rangbah ula pyntip ruh ba kane ka amendment ba la tyrwa ruh da ka Sorkar ka la pynpaw ba ka MSIPF kan nym pyntroiñ ïa ka Land Transfer Act, baroh ki rukom treikam, ki kyndon kiba treikam haba phai sha ki ADC ruh yn bud ryntih nalor ka jingthungkam thungjam ïa ki briew bad ki samla ka Jylla.
“Kine ki lai tylli ki amendment la wanrah ban pynkmen ïa ki nongshong shnong ka Jylla ba baroh ki rule bad ki kyndon katkum ka Land Transfer Act bad ki Rules jong ki ADC kin dei kiba la bud ryntih,” ula pyntip.
U Conrad u la pyntip shuh shuh ba ula ïakynduh ïa ki MLA bad ki kynhun bapher bapher, kiba la pynpaw ïa ka jingsngew halor ka mat ba ïadei bad ka land bank.
U la ong, “Ki la don bun ki MLA na ka NPP, kiba la wan bad ïakynduh ïa nga kynthup u MLA na Mawkynrew, Jowai bad na Ri-lum Garo bad MLA ka UDP kiba pynpaw ïa ka jingsngewkhia halor kane ka kam land banks ba thmu pynkha da ka MIPA. Dang ha kine ki khyndiat sngi, ki dkhot ka KSU ruh ki la ïakynduh ïa nga bad ngi la batai bniah ïa ki ïa ki amendment bapher bapher kiba la wanrah ban leh eiei halor ki jingsngewkhia jong ki kynhun bapher bapher. Hynrei wat hadien ba la pynshai, nga dang don jingsngew ba kim pat hun satia haba phai sha ka mat land bank.”.
U Myntri Rangbah ula pynpaw ruh ba ka ju shim por ïa ki briew ba kin sngewthuh shai halor ka jingthmu jong ka Sorkar namar ka donkam ïa shibun ka jingpule bad ka jingwad bniah bad ong, “Hynrei tad haduh kata ka por, kan bha ïa ngi kum ka Sorkar ban ïatrei khamjan bad ki paidbah bad ka imlang sahlang”.
“Nga la kren ha kane ka Ïingdorbar la bun sien ba kane ka Sorkar ka ngeit ha ka jingtrei na ka bynta ka bha ka miat jong ki paidbah jong nga bad kano kano ka rai ba ngi shim, ngin shim na ka bynta ka bha ka miat kaba bun jong u paidbah bad ngin ym artatien ban kynran dien ruh lada donkam,” ula ong.
Nalor kane, u Myntri Rangbah ula ban jur ba ka thong jong ka MSIPF ka long ban pynsuk ïa ka jingkynshew kam hapoh ka Jylla.