Shillong, Jylliew 30 : U Myntri ka tnad Sports and Youth Affairs ka sorkar jylla, u Bah Wailadmiki Shylla, u la ong ba ka Sorkar Meghalaya kan sdang ban leit jngoh ïa kiwei pat ki jylla ka thaiñ Shatei Lam Mihngi kiba snoh bynta lang ban pynlong ïa ka National Games ha u 2027 hadien ba la kut ka tamasa Behdienkhlam.
Haba kren sha ki lad pathai khubor, u Bah Wailad u la ong ba ka jingbuddien ïa ki kam ka dang ïaid shakhmat na ka bynta kane ka lympung kaba la pynkhreh ban long ha u Lber jong u snem ban wan.
“Haba u Myntri ka Sorkar Pdeng u wan jngoh khatduh, ngi la ïakren bniah halor baroh ki bynta kiba ïadei bad ka jingpynkhreh,” u la ong.
U la ïathuh ba ha katei ka jingïalang la ïakren naduh ka jingtei ïa ki jaka ïalehkai, ki jaka sah bad kiwei kiwei ki jingdonkam kiba dei na ka bynta ka Games.
“Na ka liang u Myntri ka Sorkar Pdeng u la pynpaw ruh ba u sngewhun bad u don ka jingshaniah halor ka jingpynkhreh jong ka Meghalaya,” la bynrap biang u Myntri.
Ha kajuh ka por u la ïathuh ba ka sienjam kaba bud mynta ka long ban ïatreilang bad ki jylla ka thaiñ Shatei Lam Mihngi kiba shim bynta lang ban pynlong ïa kane ka lympung ïalehkai.
“Mynta ka la dei ka por ban leit jngoh ïa kiwei pat ki jylla ka thaiñ Shatei Lam Mihngi kiba shim bynta lang bad ka Meghalaya. Namar ka tamasa Behdienkhlam ka la jan, ngin sa leit jingïakynduh ïa ki hadien ba ka tamasa ka la kut,” u la ong.
Haba kylli ïa ka tarik ban pynlong ïa kane ka lympung kaba heh tam ha ka Ri, u Myntri u la ong, “Ym pat don ka tarik kaba la pyntikna. Hynrei katkum ka jingïakut kaba ngi la shim ha ka jingïalang kaba khatduh ka dei ha u bnai Lber 2027.”
