Shillong, Nohprah 22: Ki nonghikai kontrak hapoh ka shatri jong ka Meghalaya Government Lower Primary School Contractual Teachers’ Association (MGLPSCTA) ki la pynrem ïa ka jingleh arsap jong ka sorkar MDA hapoh ka jingïalam u Conrad Sangma kum u Myntri Rangbah namar ïa kiwei ki nonghikai kontrak la behkam lut katba ki nonghikai kiba hap hapoh Dadenggre Constituency kaba la mih khmat da u James PK Sangma ym tang ba ki dang ïohlad ban bteng ha ka kam hikai hynrei ki la nangthung shuh shuh nalor kiba la don lupa.
Haba kren sha ki lad pathai khubor, u President ka MGLPSCTA u Babu Birbor Riangtem u la ong ba ki nonghikai kontrak ha Dadenggre nalor ki 149 ngut kiba la don lupa la pynkiew sha ka 162 mynta katba sha kiwei ki jaka la weng lut namar la aidaw ba kim pat pyndep ïa ka MTET kumba dawa ka sorkar.
U la ong ruh ba ka sorkar dangshen ha ka jingïalang ka kynhun myntri kaba la long ha ka 9 tarik Naiwieng kaba la rai ban ithuh kum ki nongtrei pura jong ka sorkar ïa ki 3,635 ki nongtrei adhoc ha kaba kin ïoh ruh ki jingmyntoi kum kiwei pat ki nongtrei kaba kynthup naduh ka baibam tymmen bad kiwei kiwei ki jingmyntoi katba ïa ki nonghikai kontrak pat ka la shu beh kam beit khlem don kano kano ka jingisynei wat la bun bun snem ba ki la ai la u synñiang sha ka imlang sahlang lyngba ka kam hikai jong ki.
“Kumno ïa ki nongtrei sorkar kiba la shu thung kum ki nongtrei kontrak ka sorkar kan thung pura wat la kim dei kiba pyndep ïa ki eksamin kum ka DSC bad ka MPSC bad wat ïa kito kiba la ïap noh ruh kiba ha ïing jong ki kin ïoh ïa ki baibam tymmen hynrei ïa ngi pat ki nonghikai kontrak la aidaw ba ngim don hok ba ngim pyndep ïa ka MTET” u la ong.
U la ong ruh ba na ka liang ki nonghikai kin sa pynlong da ka jingïakhih kaba jur ban dawa ïa ka hok jong ki ha kine ki sngi ban wan.
