Shillong, Nohprah 22 : U Myntri Rangbah ka sorkar jylla, Conrad K Sangma ha ka sngi Palei u la kynthoh tyngeh ïa ka jingkren jong u nongïalam ka Trinamool Congress haba ïadei bad ka riam tynrai ki Khasi bad ong ba kane ka la ktah bha ïa ka jingsngew jong ki nong Meghalaya
Kane ka jingkren u Myntri Rangbah kadei halor ka jingthoh ba la buh da u Kirti Azad ha kaba u la buh ïa ka dur u Myntri Rangbahduh ka Ri ba phong bad ka riam Khasi ba u phong ha ka jingwan jong u sha Shillong dang shen.
U Myntri Rangbah haba kren bad ki lad pathai khubor u la ong ruh ba katei ka jingkren jong u ka long kumba kren beiñ ïa ki nong Meghalaya khamtam eh ïa ka Jaidbynriew Khasi.
Da kaba pynrem jur ruh ïa ka jingkren jong u, u Myntri Rangbah u la ong ba utei u nongïalam jong katei ka seng sainpyrthei udei ban panmap namar ka jingkren jong u pyrshah ïa ki nongshong shnong ka jylla bad ka kolshor jong ki.
“Ki nongïalam jong kane ka party ha ka jylla ki dei ban panmap bad une uba kren ruh u dei ban panmap namar ka jingkren pyrshah ïa ki paidbah ka jylla bad ruh pyrshah ïa ka kolshor jong ki briew jongngi,” u la ong.
