Shillong, Nohprah 22: U Myntri Rangbahduh ka Ri u Narendra Modi un sa wer biang sa shisien ïa u khliehduh ka Balang katholik u Pope Francis ba un wan ïuhkjat sha India ong u President ka kynhun ki Bishop ha ka ri India ka Catholic Bishops’ Conference of India (CBCI) u Archbishop Andrews Thazhath.
U Archbishop Andrews Thazhath uba la leit ban ïakynduh ha ka sngi Balang ïa u Modi ban ai ka khublei Khristmas ha ka kyrteng ki riewngeit Katholik jong ka ri.
U Archbishop Andrews Thazhath ha ka jingïakynduh u la ban tyrwa biang ïa kaba u President barim ka CBCI, u Cardinal Oswald Gracias ba u Myntri Rangbahduh ka Ri un khot ïa u Pope Francis ban ïuhkjat sha ka ri.
“U Myntri Rangbahduh u la sngap ïa kaei kaba ngi tyrwa ban khot biang ïa u Pope sha India hadien ka jingkhot kaba nyngkong kaba u la khot ha ka jingïakynduh ïa u Pope Francis ha Vatican ha ka 31 Risaw 2021. Ha kane ka kynti ruh u myntri Rangbahduh u ong ba un phah biang ïa u kyrwoh khot sngewbha ïa u pope bad un pyrshang ruh katba lah ban pynurlong ïa kaei kaba kum ki riewngeit katholik ngi angnud,” ong ka kyrwoh na ka CBCI.
Ha kane ka jingïakynduh, u Myntri Rangbahduh ka ri u la ai ka jingkular ban bteng ïa ka jingkyrshan ïa ki rit paid ha ka ri kiba kynthup ïa ki khristan ruh haba ai jingkular ïa ka jingkyrpad ka CBCI ban ai jingïada ïa ki Khristan na kino kino ki jingshah khñiot beiñ.
Lah ban kdew hangne ba u Pope uba la wan ïuhkjat khatduh eh ha India dei u Pope John Paul II uba la wan ïuhkjat ha u snem 1999 ha Delhi bad dei ruh u Pope John Paul II uba la wan ïuhkjat ha Shillong ha ka 4 tarik Rymphang 1986.
