Shillong, Nailar, 26: Da ki spah tylli ki kali kiba wan na kylleng ki jylla jong ka thaiñ Shatei Lammihngi ban ïaid lynti na ka surokbah National Highway-6, ha East Jaiñtia Hills District ki la sahkut ha ka dheng kali na ka jingtwa biang ka khyndew hakhmat ka Tunnel ha ka shnong Sonapur, ha ka sngi Saitjaiñ.
Ka jingtwa jong ka khyndew bad ki maw ka la jia ha ki kynta ba u lapbah uba jur u la ther ha kiba bun ki bynta jong ka jylla Meghalaya bad ki kali kiba wan na ka jylla Tripura, Mizoram bad Barak valley ki la shah khang sbak ha kane ka jingtwa khyndew.
La sakhi ruh ba ka don kali kaba la sahkut ha kane ka jingtwa khyndew hakhmat kane ka krem ba la shna kyrpang ban ïaid ki kali.
Kat haduh ba la thoh ïa kane ka khubor, ki nongtrei jong ka National Highway Authority of India (NHAI) ki la pynkhuid bad khat ïa ka khyndew bad ka ktieh khnang ban pyllait ïa ki kali kiba ïaid lyngba kane ka surok.
U Deputy Commissioner jong ka East Jaiñtia Hills District u la pyntip, hadien ba la pynkhuid ïa ka khyndew bad ïa ka ktieh, la pyllait biang ïa ki kali ban ïaid na kane ka surok.
La bthah ruh ïa ki nongñiah kali ba kin long kiba ïaishah bad ym ban kyrkieh bad ha kajuh ka por ruh ban long kiba phikir bad kiba husiar haba ïaid lyngba kane ka surok.
