Shillong, Nailar 26 : Ka Synjuk Ki Rangbah Kur Ka Bri U Hynñiewtrep ka la pynskhem ïa ka seng shnat ha South West Khasi Hills, Mawkyrwat. Ha ka dorbar ba la pynlong mynta ka sngi 26tarik Nailar, 2023 palat spah ngut ki rangbah kur na South West Khasi Hills ki la ïa poi ban sakhi ïa ka jingpynskhem ïa ki nongkitkam jong ka shnat da u Bah R L Kharpran, Symbud Khliehduh ha ka ba la ïa don lang ki rangbahkur ka seng kmie ba kynthup ïa u Bah Erwin K Syiemsutnga, Aristotle Lyngdoh, Kynsai Syiem, Ïalamlin Lyngdoh, Raphael Warjri bad kiwei kiwei. La kren pdïang da u Bah Mansturdy Nongrem ba la shah jied kum u khliehduh ka shnat South West Khasi Hills ha ryngkat bad phra ngut kiwei pat ki nongkitkam ba kynthup ïa u Bah Wallambok Syiemiong, Symbud Khliehduh, B. Ioannis Shylla, Saiñpynïar bad kiwei kiwei. Ka jingïatai ha katei ka sngi la lamkhmat da u Bah Aristotle bad bah Erwin K Syiem Sutnga ha ka ba ki la kren mardor halor ka jingdonkam ban pynneh pynsah ïa ka riti kheiñkur kheiñkha na ka kmie bad kiwei kiwei ki riti dustur tynrai ba la dep shna pura kum ki aiñrew ha ka Dorbar Dalariti Rilum Khasi (Khasi Hills Autonomous District Council). Kumta ki la ban jur halor ka jingdonkam ban pynlong aiñ pura noh kham kloi khnang ban ïada ïa ki hok jong ki khun ki hajar Khasi jong ka jylla.
Ki mat ba kham kongsan ba la ïakren da baroh ki rangbah kur ka long halor ka aiñrew jong ki kur ne ka Clan Administration Bill, ki aiñ na ka Dorbar Thawaiñ Ri Indïa ki ba kynthup ïa ka Forest & Environment Amendment Act, ka Uniform Civil Code bad kiwei kiwei ki aiñ ki ba lah ban long kum ki atïar ban iuhroit ïa ka thaiñ shatei lammihngi jong ka Ri Indïa ka ba thew pyrshah ïa ki riewlum kynthup ïa ka Rilum Khasi. La pynkynmaw ba ka aiñ khang pom dieng ha u snem 1996 ka la pynsyrtok bad la hiran palat lïam ka thaiñ West Khasi Hills baroh kawei, u Bah Erwin u la maham ba kane ka aiñ ba mynta ka thew syndon ba ka sorkar kmie kan kam trai ïa ki khlaw ki ba bun kynthup ruh ïa ki jaka shrah ki ba khlem don ba rep ba rïang. Ha ka ba sdang u Bah Wallambok Syiemiong u la jer shibun tylli ki kyndon ba dei ban pynlong aiñ ha ka Dorbar Dalariti ka ba kynthup ruh ïa ki mat kongsan kum ka ïakajïa pud jylla, ki kam suwari, bad kiwei kiwei ki bynta ki ba dei ban the lakam na ka bynta ban ym shah iuhroit ha ka sorkar jylla ne ha ka sorkar kmie khamtam ïa ki hok tynrai jong ki khun ki hajar. La shim bynta lang kiwei kiwei ki rangbah ha ka jingïatai ha ka ba la mih ka jingkren halor ka tangjait, ka tipkur tipkha lyngba ka riti the sohpet, ka tehkur ka tingkur bad kumjuh ruh ha ki riti hïar pateng ki rikynti ba kynthup lang ïa ki nongtymmen bad nongkhynraw. Ha ka ba kut artat la kren ai khublei da u Bah B Ioannis Shylla, Saiñpynïar ha ka ba la pynkynmaw artat ban dang ïai khluh ban pynïar ïa ka seng shnat ban kham skhem ka synjuk ha ki kam ban ïa da ïa la ki hok tynrai jong ki khun ki hajar ha Ri Khasi.
