Shah mudui ka Chairperson ka MSCW ba ïaid rally lang bad u Kyrtong ka NPP ha Jowai

Shillong, Rymphang, 14: Ka Election Commission of India (ECI) ka la pan jingpynshai na ka Chairperson jong ka the Meghalaya State Commission for Women (MSCW) ka Kong Phidaloi Toi halor ka jingkynnoh ba ka la pynkheiñ ïa ka Model Code of Conduct da kaba ïashim bynta ban raid paidbah bad u kyrtong ka NPP na Jowai u Bah Wailadmiki Shylla.
La bthah ka Kong Toi ban ai jubab hapoh ar sngi.
Ka kynhun jong ki nongïalam ka seng Congress ba la ïalam da ki Media Coordinators jong ka All India Congress Committee (AICC)- ka Bobbeeta Sharma bad u Mathew Anthony ryngkat ka jingsynran lang jong ka President ka State Mahila Congress ka Kong Joplin Scott Shylla ki la aiti da ka ujor hakhmat u Chief Electoral Officer (CEO) u Bah F.R Kharkongor ha ka sngi Baar da kaba dawa ba dei ban weng noh mardor ïa ka Kong Toi na ka shuki kum ka Chairperson jong ka MSWC bad ban pyndam noh ka jinglong kyrtong jong u Bah Wailadmiki na ka rynsan ïakhun elekshon.
“Ngi la shimkhia ïa ka jingujor bad nga la aiti ha u Additional CEO in-charge MCMC u ban sa pan ïa ka kaiphod na ka ophis u Deputy Commissioner jong ka West Jaiñtia Hills District bad ban pynshisha ïa ki jingkynnoh ba la kdew ha ka jingujor,” ong u Bah Kharkongor ha ka jingïakren bad ki lad pathai khubor.
“Tang shu ïoh ïa ka kaiphod, yn sa leh ïa kaba donkam. Lada donkam yn sa pan jubab. Ngi hap ban ïoh na baroh ki liang, na ki bor synshar distrik ruh ngin hap ban ïoh ïa ka kaiphod, ngi hap ban ïoh ïa ka jubab na kaba shah ujor,” u la ong bad bynrap, “nangta ngin sa phah ïa ka kaiphod sha ka Election Commission, ka ban sa bthah ïa ngi kaei kaba ngi dei ban leh.”
Haba kylli, u Bah Kharkongor u la ong, “ngin hap ban peit ïa ki rule bad ngi hap ban peit ruh ïa ki jingshisha jong ka jingujor. Namarkata, ïa mynta hi katba ngim pat ïoh da ka jingthoh ngam pat lah satia ban ong eiei.”
Ka Congress ha ka jingujor, ka la ong ba ha ki video bad ki dur ba la pynsaphriang ha ka rynsan jong ka Social Media, la ïoh tyngkreiñ ba ka Chairperson ka la iaid lang ha syndah jong u kyrtong ha surok Jowai. La ïohi ba ka ieng bad u Bah Shylla shabar jong ka ophis u Deputy Commis sioner ha ka sngi ba u la leit thep kyrteng. Ka Kong Toi ka la long ka shakri sorkar hadien ba ka la shah thung kum ka chairperson jong ka commission ha u Nohprah, 2021.
Katkum ka Meghalaya State Commission for Women Act, 2005 ka chairperson, ka vice chairperson, ki dkhot, ki Ophisar bad kiwei kiwei ki nongtrei jong ka Commission kin long ki shakri sorkar katkum ka Section 21 jong ka Indian Penal Code bad ka Section 2 (C) jong ka Prevention of Corruption Act, 1988. Ka Kong Toi ka la pynkheiñ ruh ïa ka Representation of People Act of 1951.
“Ka Kong Toi ka la pynkheiñ ruh wat ïa ka Model code of Conduct da kaba ïashim bynta ha ka elekshon rally bad u kyrtong ka NPP. Namarkata, ngi kyntu ïa ka Election Commission ba kan shimkhia halor kane ka jingpynkheiñ aiñ bad ban weng noh mardor ïa ka Kong Toi na ka shuki kum ka Chairperson,” ong ka Congress ha ka jingujor.
Ha ka 13 tarik, Rymphang, 2023 u Returning Officer jong ka Jowai Constituency u la phah ïa ka show cause notice sha ka Kong Toi ba kan ai jubab halor ka nongrim ba balei yn ym lah ban pynshitom pyrshah ïa ka halor ka jingpynkheiñ ïa ka Meghalaya Services (Conduct) Rules, 2019.
“Ka jubab jong phi ka dei ban poi sha uba soi kyrteng hapoh ar sngi hynrei lym kumta yn pynshitom pyrshah ïa phi,” ong u RO.
Ha ka notis la ong, “kum ka Chairperson jong ka Meghalaya State Commission for Women, la ñiew ba phi dei ka shakri sorkar katkum ka jingbatai hapoh ka Section 21 jong ka Indian Penal Code, 1860. “
Ka ong ruh ba katkum ki kyndon jong ka Rule 20 jong ka Meghalaya Services (Conduct) Rules, 2019 ka kdew, “ki shakri sorkar kim lah ban long ki dkhot jong, lane ban ïadon bynta bad kano kano ka seng saiñpyrthei, lane bad kano kano ka kynhun da kaba ïashim bynta ha ka saiñpyrthei, lane ha kino kino ki kam kiba ïadei bad ka saiñpyrthei, lymne ban ïashim bynta, ban ai kum ki jingïarap, lane ban ïarap ha kino kino ki bynta, lane ha kino kino ki political movement lane kino kino ki kam.”
“Katba, ki kam jong phi katkum ba la ujor ki long ki jingpynkheiñ ïa ka Rule 20 jong ka Meghalaya Services (Conduct) Rules, 2019 bad kiba ktah ïa ka jinglong pdeng ba la khmihlynti na ki shakri sorkar,” la ong ka notis.