450 tylli ki kali shimet kin pynkylluid ïa ka surok tang shu sdang kit khynnah ki School Bus

0

Shillong, Rymphang, 14: Kumba 450 tylli ki kali jong ki riewshimet kin sa pynkylluid ïa ka surok tang shu pyntreikam ïa ki School Bus ki ban kit ïa ki khynnah skul na ki skul bapher bapher jong ka nongbah Shillong.
Kane ka long katkum ka kaiphod ba la aiti da ka Sorkar Jylla hakhmat ka Iingbishar Meghalaya High Court ha ka sngi Baar.
Haba pyntreikam ïa ka hukum ba la pynmih ha ka 7 tarik, Rymphang, ka Sorkar Jylla ka la ai jingtip ba la shimkhia marmar khnang ban pyntreikam noh ïa ka jingpyndonkam ïa ki School Bus.
Ka Sorkar Jylla ka la khmihlynti kumba 450 ki kali jong ki riewshimet kin sa pynkylluid ïa ka surok tang shu pyntreikam ïa ki school bus ki ban kit ïa ki khynnah skul.
Katkum ka Sorkar Jylla, ïa kine ki lad ki lynti yn pyntreikam noh mardor bad ïa ka jingjop yn dup lah ban pyni noh ha kaba kut jong u bnai.
Ha ka hukum ba la pynmih hadien ka jingshong bishar ïa ka Public Interest Litigation, ka iingbishar ka la ong ba ka dei ka bynta ba kongsan tam ba la leh da ka Sorkar Jylla bad lada tang 250 haduh 300 tylli kin pynkylluid ïa ka surok ha Shillong, kan weng shikatdei eh ïa ka jingdheng kali.
La khmihlynti ba ki school buse kin sa sdang ban ïaid noh mardor tang shu sdang plie ki skul bad la pynshlur ïa ki kmie ki kpa ba kin shah ïa ki khun ki kti ban pyndonkam ïa kine ki bos tang shu pynbiang ïa ki lad jingïada ha kine ki bos da ka Sorkar Jylla, la ong.
Ka iingbishar ka la ong ba ka Sorkar Jylla ka dei ban thung ïa ki nongtrei ki ban peit ruh ha kaba ïadei bad ka jingweng ïa ka jingdheng kali katkum ba ladep tyrwa. Kiwei kiwei ki jingïada kumba la kdew ha ka kaiphod ba la ai jubab mynshwa dei ban shim katkum ka por ba la buh.
Ka jingshong bishar kan sa long biang ha ka 14 tarik, Lber.

Leave A Reply

Your email address will not be published.