Ka jingrai u Dr Mukul ban ïakhun lang na Tikrikilla ka dei ka jingibeiñ ïa ki paid Songsak : Conrad

0

Tura, Rymphang 14 : U National President ka National People’s Party (NPP) bad Myntri Rangbah ka Jylla Conrad K Sangma, ula pynrem jur ïa u Dr Mukul Sangma bad ong ba ka rai jong u ban ïakhun lang na Tikrikilla ka dei ka jingibein ïa ki paidbah ka Songsak kiba la pynjop ïa u kum u MLA ha u 2018.
U Conrad ula kren ïa kane na ki rynsan ïalap elekshon hynne ka step sngi ba-ar ha kylleng ki Constituency kynthup ha Songsak ban pan jingkyrshan na ka bynta u kyrtong ka NPP Nihim D Shira, u Rakesh A Sangma bad u Rakkam A Sangma ha ka jingïadonlang u Nongïalam ka Party Thomas A Sangma bad kiwei kiwei. Haba pan ia ka jingkyrshan ïa u Nihim D Shira u ban ïakhun pyrshah ïa u Dr Mukul na Songsak, u Conrad ula ong ba ki paidbah ka Songsak kila shem jingjynjar namar u MLA ula bunkam tang ha ka kam kynthih seng na ka Congress sha ka TMC bad khlem lah pynurlong ïa ka jingangnud jong ki paidbah.
Ula kheiñ ïa u Dr Mukul kum u briew bym nang ban burom kylliang namar ka jingjied ba un ïakhun na Tikrikilla katba u dang dei u MLA ka Songsak. “Ki paidbah ka Songsak ki dei ban kylli ïa u Dr Mukul, lada u jop na baroh artylli ki constituency, kano ka constituency ba un iehkam” ong une u Khliehduh ka NPP haba ong ba ka mon u paidbah hi kam long shuh ïa ka TMC bad u Dr Mukul Sangma un shah rem na baroh artylli ki constituency.
Haba pynpaw ba ki paidbah ka Songsak ki donbok palat ban don ïa u Nihim kum u Nongïalam jong ki u ba kloi ban trei naka bynta ki paidbah ka Songsak, u Conrad ula ong “U Dr Mukul um ju wan sha nga. Ula bunkam hala ka jong ka pyrthei. U klet ïala ki jong ki briew naka constituency bad mynta ula khan hapdeng ka Songsak bad Tikrikilla da ka jingkyrmen ba un jop. Ki paidbah kim dei ban ngop da ki jingkular jong u bad ban vote ïa ka party ka ban sa thaw ïa ka Sorkar kaba bun paid eh”.
“Ngi sngewskhem ba ngin jop bun eh ki seat. Ha ka jingpeit jong ngi ha kane ka kynti, ka NPP kan jop na Songsak bad Tikrikilla ruh kumjuh. Ki sngi ba khatduh jong u Dr Mukul kila jan namar ki paidbah kin vote ïa ka party kaba peit ban don ka jingkitkhlieh” ula pynpaw.
Ha Melim kaba hap hapoh ka Gambegre constituency ba la pynïeng da u Rakesh A.Sangma , u Conrad ula ther tyngeh ïa u Saleng Sangma bad ka Congress namar ka jingbym lah khie khlieh shuh ha Meghalaya bad ka bym ikot bor ban jop wat tang 2 seat ha ka Jylla baroh kawei.
U Myntri Rangbah ula ban jur ba ka NPP kala trei da ka jingleh hok bad shimkhia shisha ban pynurlong ïa ki jingkular bad ki jingdawa jong u paidbah. Ula pyntip ba ka Sorkar kala pynkha ïa bun ki Civil Sub Division bad C&RD Block ha u snem bala lah hapoh ka Jylla kiba dei ki jingangnud jong u paidbah la slem bha bad ïa kane la lah ban pynurlong tang da ka Sorkar ba ïalam daka NPP.
Ha ka jingïalap elekshon ha Rongara kaba hap hapoh ka Rongara-Siju Constituency bala pynïeng da u Rakkam A Sangma, u Conrad ula ong ba ha kine ki san snem balah, wat hapdeng ki jingtynjuh kiba bun, ka Sorkar ba ïalam daka NPP kala lah ban pyntyllun ïa ki kam pynroi bapher bapheer ha Jylla.
“Ka jinglong jingman ka saiñ pyrthei ha u 2018 bad 2023 kala ïapher bak ly bak. Ki paidbah ha Meghalaya mynta kila ai ka jingshaniah ba pura ha ka NPP, kaba la pynlong ïa u Dr Mukul Sangma bad ka Kynhun ban mih noh na ka Congress bad leit ïasoh sha ka TMC. Kila jop 21 seat ha u 2018 hynrei mynta ka Congress kam don shuh wat tang uwei u MLA ruh” ula bynrap.
U Conrad ula ong ba ka Congress ka don hapdeng ka kynrum kynram ha ka kam long Nongïalam bad kane ka party kala nang tlot ha kylleng ki Jylla hapoh ka Ri. “Ka Congress Party kala shah kyntait ha kiba bun ki Jylla hynrei u Dr Mukul bad ka jingkheiñ jong u ban ïasoh sha ka TMC kala bakla lut namar kane ka party kam don lawei satia hangne.

Leave A Reply

Your email address will not be published.