Katno pyrton donkam bor pahara ban khang lad ïa ka jingtih bad khaïi dewiong beaiñ

0

Shillong, Rymphang 14 : Ka ïing bishar High Court jongka jylla ka la buh jingkylli ïa ka sorkar jylla haduh katno pyrton donkam bor pahara ban lah ban khang lad ïa ka jingtih bad khaïi dewiong beaiñ ha ka jylla bad ha kajuh ka por ka bthah ruh ïa ka sorkar ban thaw da kiwei ki lad ki lynti ban kamai jakpoh ki paid nongshong shnong.
“ Ka sorkar ka dei ban ai jingkheiñ katno pyrton donkam ïa ki bor pahara ban khanglad shisyndon ïa ka jingtih dewiong beaiñ da ka liewkhnai ym da ki bor saian kane ka juk ba mynta, bad ka jingkhaïi beaiñ ïa u dewiong” ong ka hukum ba la pynmih da ka Division Bench haba bishar ïa ka mukotduma PIL.
ïa kine ki jingtip ba bniah dei ban pynkhreh da u Justice Katakey namar ka sorkar baroh shi katta ka khlem shim khia ban peitngor bad pyrkhing ïa kane ka jingtih bad khaïi dewiong beaiñ bad kan kham biang ruh lada pynkhamti ha ki bor pahara CRPF.
Halor kane ka hukum jongka ïing bisharr na ka liang u Deputy Solicitor General u la pyntip ba ka kamram jong ki Central Industrial Security Force (CISF) ka long ban pahara ïa kino kino ki jingtei jingsad bad ym dei ban leh ïa ka kam ki pulit. Hynrei u la pyntip ba ki don ki Central Reserve Police Force (CRPF) ban leh ïa ka kam kiba la shim jingiarap da ki bor pulit.
La pyntip ruh ba kine ki don ki pyrton bad battation hangne ha Shillong bad ha Guwahati ruh lada donkam jingïarap.
Ka ïing bishar ka la bthah ruh ïa ka sorkar ban thaw ïa ki skhim ban ïarap ban pynim jakpoh ïa ki paidbah ha kito ki jaka ba don ki par dewiong.
Kaei kaba dei ban ïaroh ka long ba ha kiba bun kine ki jaka ki briew ki la kwah da kawei ka kam ym shuh da kane ka kam tih dewiong kaba buh ïa ka jingim ruh ha ka jingma.
Hooid ki briew ki la im ja na kane ka kam la slem bah mynta hynrei hap ban thaw da ki lad ki lynti ban pynlong ïaki ban iehnoh ïa kane ka kam bad kane ka long tang lyngba ki skhim ba kin ïoh ban trei ban ktah ban kamai jakpoh. Donkam ruh ban ai jinghikai bad pynshai ïa ki paidbah ba kin sngewthuh bha halor kane.
Ka ïing bishar ka la pynpaw ruh ba ïakane ka kam khaïi dewiong beaiñ ym shuh la leh da kijuh ki briew.
La pynpaw ruh ba ka jingbishar halor ka jingpynkheiñ ïa ki hukum ka ïing bishar da u SP ka Khliehriat ka dang sahteng namar ba u dei ban don ha katei ka jaka namar kane ka por election.
“ Hynrei une u SP u dei ban wan mih hakhmat ka ïing bishar ynda la bthah ïa u ba un wan mih. Ka jingbishar biang ïa kane ka mukotduma kan long ha ka 28 tarik Rymphang 2023.

Leave A Reply

Your email address will not be published.