Sei madan u heh Pulit ïa ka jyrsieh ha tnad Pulit mar ïamih na Phatok, shah kem biang ha ki CID

Shillong, u Rymphang 14: U Bah GK Ïangrai , MPS uba long uba long u Assistant Inspector General (AIG) jong ka tnad Pulit u la shah kem biang ha ka tnad CID tang mar ïa mih na Phatok Shillong District Jail mynta ka sngi.
Hynrei shuwa ba ki Pulit CID kin thep biang ha ka kali Bolero, u Bah Ïangrai uba la shah ser phatok halor ka jingkynnoh pyndonkam bakla ïa ka Nationwide Emergency Response System, u la phla paidbah lyngba ki lad pathai khubor ïa ka jyrsieh kaba shyrkhei kaba don ha tnad Pulit bad pynpaw ruh ba u don hapdeng ka jingsyier ïa ka jingim la jong na ka bynta kane ka jingphla jong u.
Une u heh Pulit u la shah kem ha ka 2 tarik u Naiwieng 2022 bad ka District Court ka la ai jamin ïa u ha ka 7 tarik mynta u bnai.
Da kaba shim ïa ka lad ban pynsngew ïa kaei kaba u la kum hapoh lyngba ki lad pathai khubor kiba la ap lypa ïa u hakhmat khyrdop ka Shillong District Jail, u Bah Ïangrai, u la ong ka jingshah kem jong u kadei ka jingthmu ban set ïa ka shyntur ne ban khanglad ïa u ba un sei madan ïa ka jyrsieh kaba don ha tnad Pulit hadien ba u la pan RTI ïa kiba bun ki jingtreikam jong ka sorkar bad kumjuh ruh hadien ba u la ujor ejahar lyngba ka Crime Branch.
“Nga dang u langkñia jong ka kynhun ki High Level ha ka tnad Pulit kiba thmu ban pynhiar kput ïa nga”, u la ong, da kaba ban ba wat lada ka met jongu ka shah set, hynrei ka mynsiem pat ka laitluid.
Shuh shuh u la ong ba ïa kine ki High Level Pulit la kyrshan da ka kynhun ki Businessman kiba la pulom ki kam kontrak bad ka tnad Pulit lyngba ka jingleh Benami. Da kaba ther tyngeh ba kane ka jingshah kem jong u kadei ka jingïasuhbuit ki heh Pulit bym dei trai jylla, u Bah Gabriel u la kynnoh ba bun na ki Investigating Officer (IO) kim dei satia ki trai ri trai muluk. Shuh shuh u la ong ba hadien ba u la shah pynkynriah na ka kam AIG sha ka kam Commandant jong ki SF-10, hynrei ha ka jaka jong u la don lypa uwei pat u Commandant ba la pynbeit da ka rukom kaba biang bha. “Nga kyrpad ia ki heh Pulit ban nym pynthut bad pyndik ïa kiba haïing hasem jong nga. Nga kloi ban aiti na ka bynta ka ïing ka sem jong nga bad ngam tieng lada nga ngat ha kajuh ka apot kum u Pulit PJ Marbañiang, u Fullmoon Dhar, u Bah Cherishterfield Thangkhiew bad bun kiwei ki kam kiba ki heh Pulit ki buhrieh”, u la ong.
Da kaba thap ïa ka shadem ne ka bynta kaba ki Pulit ki deng ki badge, u Bah Gabriel, u la ong ba ki don ki heh Pulit kiba deng khyllew ïa ki Badge hynrei kiba bit da ka snam jong ki briew kiba lui lui bad kiba kum kine ki briew ki la pdiang Khusnam. Da kaba kdew ba ki don ki heh Pulit kiba donkti ha ka jingsiat ïap ïa u Bah Cherish, une u heh Pulit u la ong ba ki la don shibun ki jingtohkit hynrei kim shym la poi shano shano ruh. “Kaei kaba la jia ïa ka jingtohkit siat ïap ïa u Bah Cherish, mano ba donkti, phi la ïa ïoh jingtip?, kaei kaba la jia ïa ka jingtohkit halor ka jingïap u SI PJ Marbañiang, phi la ïa ïoh jingtip?, u la ong.
U Bah Gabriel u la ong ruh ba haba u don ha Phatok ki Pulit ki la pynkheiñ ïa ka hok longbriew jong u bad ïa kane u la ai jingujor sha ka ïingbishar lyngba ka lynti kaba dei bad u la thoh ruh bun tylli ki jingujor ha kine ki 102 tylli ki sngi ba u don ha Phatok. “Kine kidei ki tiar thma jong nga pyrtshah ïa ki heh Pulit, ngam don eiei. Ki lah ban siat ïa nga ha kano kano ka por, hynrei nga dang don ki sakhi halor ki jyrsieh kiba shyrkhei bad lada nga pyllait paidbah ïa kine ka tnad Pulit baroh kawei kan khyllem”, u la ong, da kaba ïathuh u la thoh haduh lai dista ka kot sada ïa kine ki shithi ujor.
Da kaba kren khñi ïam, une u heh Pulit u la ong ba um don shuh kano kano ka lad kamai, namar ba ki la khang lut ïa ki lad kamai jong u bad wat ka pisa kaba don ha Bank ruh ki la khang bad ïa ki jaka puta ruh ki la knieh noh ki kot ki sla. “Baroh kine ki jingdon jingem ki dei ha ka kyrteng jong nga, namar ngam dei u briew uba thok bad buhrieh kum ma ki da kaba ai ha ka kyrteng kiwei”, u la ong. U la ban ruh ba dei ka jingtrei shitom jong u naduh ba u dang rit, da kaba leit bylla ñiad juti, shna syntiew, leit hikai skul, shim tution ban kamai ïa ka ïing ka sem.
U la ïathuh ba ki la thombor ïa ka hok ka jingngeit niam jong u, ha kaba kim shah wat ban deng ïa u Rosary haba u don ha Phatok. Wat ïa ki nongtrei kiba ju trei bad u ha ka tnad Pulit ruh, ki la pynbor ba kin phla bad sakhi pyrshah ïa u.
U Bah ïangrai u la phla ruh ba dei ha ka surok bah National Highway ba u la ngat ha kane ka apot, ha kaba wat ïa ka kyrteng jong u ruh la pyndonkam bad la pyndonkam ruh ïa ka jingsoi jong u.
Khatduh u la ong ba u shaniah ha ka jingbishar ba hok jong ka ïingbishar na ka bynta kane ka jingleh donbor, ka jingthombor bad ka jingpynkheiñ ïa ka hok jong u kum u briew.