Nongpoh, Nailar 25: Kawei ka Petrol Pump kaba don ha Umran Diary, Ribhoi District kaba la tip kyrteng kum ka Indian Oil Umran Fuel kaba don harud surokbah National Highway-6 ka la shah lute ha ka step phyrngab sngi U Blei ha ki runar bym lah satia ban ithuh.
Katkum ka khubor ba la ïohlum la ïathuh ba kane ka la jia ha ka por kumba 5:00 baje eiei mynstep katba u Manager u dang thmu ban plie ïa ka Petrol Pump hynrei kynsan kynsan la wan mih kumba saw ngut ki briew bym lah ban ithuh durkhmat kiba la patan beit ïa u bad teh ruh ïa ki kti ki kjat jong u bad ki nongtrei jong ka Petrol Pump watla u Manager u la pyrshang ban ïakhun ïa ki hynrei um shym la lah satia hynrei u la shah ot pynban na ki bynta jong ka kti da ki kynja tiar ba nep ba ki runar ki pyndonkam ha ka por ba lute.
Ha kane ka jingjia, ki runar ki la ïoh rong ïa ka pisa kaba la kot da ki lak tyngka kaba dei ka pisa na kaba die ïa ka umphniang petrol ha ka 23 tarik bad 24 tarik mynta u bnai. Ki runar tang shu ïoh khung ïa ka pisa ki la phet krad na kane ka jaka.
Ki Pulit jong ka Ri-Bhoi hadien ba la ïoh jingtip halor kane ka jingjia ki la leit mar mar ban pynlong ka jingtohkit bad ban khmih bniah lyngba ka CCTV khnang ban lapdien ïa ki runar ba donkti ha ka kam lute.
