Kular ka Sorkar ban kyntiew ïa ka dor synsar bad pynkhreh ban ai jingïarap sha ki nongrep

Shillong, Nailar 25: Ka Sorkar Jylla lyngba u Myntri Rangbah, u Conrad K Sangma ka la kular ha khmat ka kynhun ki nongrep synsar bad nongïalam shnong na ka thaiñ Mawkynrew ha ka jingïalam u Bah Banteidor Lyngdoh, MLA ba kan thaw lad thaw lynti ban kyntiew ïa ka dor synsar kaba la hiar shaba palat ha ki ïew ki hat.
Kane ka jingkular na u Myntri Rangbah ka la mih na ka jingleit ïakynduh ka kynhun ha ïing sah jong u myn ha ka 22 tarik u Nailar, 2024.
“U Myntri Rangbah u la kular ban ïakren bad ka Myntri kam-rep ka Sorkar Jylla kumjuh ïa ki ophisar ban weng ïa kane ka jingeh”, la ong u Bah Banteidor uba la ong ba ha ka jingïamir jingmut u Myntri Rangbah u la pynsngew ka Sorkar ka la thaw lad thaw lynti ruh ban ïarap ïa ki nongrep.
Ka Sorkar ka don ruh ka jingthmu ban pynshlur ïa ki nongrep ban don ha ki kynhun ban long kum ki seng ïatreilang khnang ba kin lah ban saiñ pynwandur ïa u synsar uba dang shu kheit na lum sha ka rukom ban long uba la pynbit pynbiang lypa (finished products) lyngba ka jingïarap ka Sorkar.
Kum ban shu kdew ba kane ka jingleit ïakren ïa u Myntri Rangbah ka dei na ka rai ba la shim na ka jingïalang kaba la long ha ka 01 tarik u Nailar, 2024 ha Thangsning kata hadien ka jingïoh pdiang ïa ka jingud jingnam na ki nongrep synsar ka thaiñ Mawkynrew ba ka jinghiar ka dor ka la long shaba palat kata na ka 130 tyngka ha ki snem ba la dep sha ka 30 tyngka mynta shi kilo nalor ka jingshah ot kilo ha ki mahajon ha Mawiong .
Ha katei ka jingïalang, ki nongrep kiba shaniah ha ka kam thung synsar ki la ong ba ka jinghiar ka dor ka la ktah ïa ka ïoh ka kot jong ki haduh ba ki la shem jingeh ban pynleit skul ïa la ki khun ki kti jong ki bad pynpaw ba ka dor die kam ïahap kam ïa poi shuh bad ka bai pynlut ha kaba trei ba ktah bad sumar ïa une mar rep khlaw.
Kumba bunsien hi ki nongrep ki pynpoi ïa u synsar ha ka ïew khaïi synsar ha Mawiong bad hangne pat nalor ba ka dor ka la rit lypa ki mahajon ki ot kilo ia u synsar jong ki bad phiah kyrdan No 1, No 2 bad No 3 ïa une u mar rep khlaw ha la ka jong ka jong ka dor.
Ki la ong ba haba kylli ïa kitei ki mahajon balei ba ka dor ka hiar palat, ka jubab kaba ki nongrep ki ïoh ka long ba ka jingdawa synsar na shabar jylla kam don katba ka jingpynmih synsar ka bun bha bad kumta hap ban shu set kudam ia u.