Nongstoiñ, Jylliew, 27: Ki ophisar ka tnad khlaw jong ka jylla kim nud ban saham ha khmat ki nongkhaïi bad ki nongthang, rnga kynnoh ki paitbah ka West Khasi Hills. U bah D.Sohshang uwei na ki nongshong shnong ka West Khasi Hills, haba ïakren bad u nongthoh khubor, u la ong ba ha kawei ka por u la pynkit dieng kseh ban ot lyntang na ka bynta ban shna ïing bad u la shah beh thong ha ki nongtrei ka tnad forest haduh ba u la sheptieng haduh katta katta.
Utei u rangbah u la ong ruh ba kaba lyngngoh ka long ba haba kit dieng ban phah ot na ka bynta ban shna ïing ruh ki beh thong. Balei kim leit beh thong ïa ki trok kit rnga namar haba thang rnga ki pom lut bad dieng heh bad dieng rit, haduh ba ki khlaw kin da synlen bad peit satang ka khyndew suda, hynrei haba ki pom ïa ki dieng ban ot lyntang pat ki pom tang ïa kiba la heh bad kiba la ïaw bha.
U la ong ruh ba lada ki ophisar ka tnad khlaw ki pyrkhing haduh katne, hato balei kim leit sha ki jaka tang rnga ban khynra lada kata ka aiñ kaba pyrkhing ban pom dieng ka don. Uwei pat u rangbah u bym kwah ban pynpaw kyrteng, u la ong ba ka la jia shisien ba ki nongtrei ka tnad forest ki la pyrshang ban leit sha ki katto katne ki jaka thang rnga ha West KHasi Hills ban pynsangeh, hynrei ki la shah ther maw ha ki nongthang rnga haduh ba ki hap ban phet krad na katei ka jaka .
Utei u rangbah u la ong ruh ba lajan man ka sngi u ju leit ju wan na Riangdo sha Nongstoiñ bad u ju lap ba ki trok kit rnga kiba mih na ki thaiñ Riangdo, Nonglang bad wat na ki thaiñ Nongstoiñ, ki ju ïaid sahuh ban leit buh rnga ha ka karkhana saiñ nar kaba don ha rud ka wah Rwiang hajan ka jingkieng.
Hynrei ki ophisar ka tnad khlaw haba ki ïohi ïa kitei ki trok kit rnga ki khaprip noh ïa ki khmat bad phai da ka lyngkdong. Katei ka jingleh jong ki ka pyni shai kdar ba ki la shah pynmatlah ha ki song pisa jong katei ka karkhana saiñ nar. U la ong ruh ba lada ka jingthang rnga kan dang ïai bteng hadien san snem baroh kawei ka West Khasi Hills kan sa synlen lut.
