Ryngkat ka jingleit sngewlem, jurip ka FKJGP ïa ka jaka ba hap ka Bolero Pick Up ha surok Thieddieng

Mawkyrwat, Jylliew, 27: Ka Federation of Khasi Jaiñtia & Garo Peoples (FKJGP) jong ka South East Khasi Border Circle ha ka jingïalam u samla Kyrmen Shangdiar ha ryngkat ki nongkitkam bad dkhot ka seng ka la hiar ban jurip ryngkat ka jingleit ban sngewlem sha ki longïing ba la jia hap ka Bolero Pick-Up ha ka surok ban leit sha ka shnong Thieddieng.
Lah ba pynkynmaw ba ka jingjia hap jong ka Bolero Pick-Up ka la jia naduh ka 13 tarik u Jylliew, 2023. Ha kane ka jingleit ban ïa kynduh ki nongïalam jong ka FKJGP ki la leit ban peit da la ki jong ki khmat ïa ki longïing kiba ïa kynduh ïa ka jingjia ba sngewsih ba la duh noh ïa kiba ha ïing ha sem, kiba ieit ba thoiñ bad kyrpang ïa kawei na ki longïing ba la ieh khunswet kaba ka kmie bad u kpa jong katei ka longïing ki la sumar ïa 2 ngut ki khunswet kiba dei ki khun ka hynmen hynrei mynta ki la ieh noh syndon ïa la ki jong ki 2 ngut ki khun rit.
Namarkata, na ka liang ka seng ka la kyrpad ba ki kali bad ki briew lane driver kiba kamai sha kane ka thaiñ ba ki dei ban da husiar bad phikir namar ba sniew palat ka surok namar ka jaka ba long riat, kumjuh ban nym kit palat put. Shuh shuh ka kyrpad ruh ïa ka sorkar ba kam dei ban shu ieh shrah ïa kane ka surok kaba la palat mynta 40 snem, hynrei ka dei ban shimkhia ban maramot lane ban pynïoh rong noh bad kyrpad ruh ba ka tnad PWD Road. “Ka dei ruh ban ker da ki kynroh (Railing) haduh da ïoh ïa ka surok ba bha khnang ban lait na kine ki jingjia ba sngewsih”, ong u samla Kyrmen.
Ha kawei pat ka liang ka seng ka ai khublei ïa ki nongshong jong ka shnong Thieddieng bad ïa u Rangbah Shnong kiba la trei bor met, met bad mynsiem ban sei ïa katei ki met ïap ha ka jingïarap lang jong ka Mawsynram Police Station kiba la leh shitom haduh ban sei lut ïa ki met ïap na katei ka riat.