Mawkyrwat, Jylliew, 27: Ka Hynñiewtrep Youths Council, South West Khasi Hills District lyngba ka Education Cell da ka jingsngewkhia mynta ka sngi ki la leit ban ïa kynduh ïa u Deputy Commissioner jong ka South West Khasi Hills District ban pynsngew ha u bad ban thaw ki lad ki lynti ban the-la-kam ïa ka jingkynrei jong u drok hapoh jong ka distrik.
Hadien ka jingleit ïa kynduh, u samla Pynskhem Kharjarin, General Secretary Education Cell jong ka HYC South West Khasi Hills District u la ong ba da ka jingsngewkhia kaba khraw ha kaba ïa dei bad ka jingnang kynrei bad jingnang pur sted jong ka jingsniew jong u drok ha ka imlang sahlang, kaba la teh mraw ym tang ïa ki khun samla jong ka dong ka thaiñ ne wat jong ka jylla hi baroh kawei ki la leit ban ïa kynduh ïa u bah T. Lyngwa, IAS, Deputy Commissioner jong ka South West Khasi Hills District ban pynsngew ïa ki jingeh.
Ym tang kata u la ong ruh mynta lei lei kaba i shyrkhei ka long ba une u jingdih ba sniew u la sdang sa ban wad jaka ban suh thied sa ha ki khyllung khynnah kaba la buh ïa ki kmie ki kpa ha ka jingsheptieng bad jingsyier mynsiem. Namarkata, halor katei ka bynta, ka seng ka buh ka jingkyrpad ïa ka ophis ba mynta ka la i donkam palat ban shim ïa ki sienjam bad ki lad jingïada ba kyrkieh ban pynsngewthuh sa ha ki khynnah kiba dang kham rit karta, kata kiba dang naduh karta kaba 12 snem shaneng lyngba ki skul pule jong ki (Educational Institution) ha kaba ïadei bad ka jingsniew bad jingktah jong u drok ïa ka jingim u briew.
Kumta na ka liang ka HYC lyngba ka Education Cell South West Khasi Hills District ka la buh ka jingkyrpad ba ka ophis jong u Deputy Commissioner, South West Khasi Hills District ba kan shim khia ïa katei ka mat, “Ka jingsniew jong u Drug” ban kynthup ïa ka ha ki kot pule jong ki skul bad kolej hapoh ka distrik bad ban pynsngew bad ban pynkynmaw lyngba ki nonghikai ha ki jaka pule (Educational Institutions).
Ha kawei pat ka bynta, ka seng ha ka jingthoh ba ki la phah ha u Deputy Commissioner, South West Khasi Hills District ka la buh ka jingkyrpad ba lada long kaba lah, ban shim ruh ïa ki sienjam ban pyn-sngewthuh lyngba ki video lyngkot lyngba ki smart class, lane lyngba ki video lyngkot ha ki awareness programme khnang ba ki khynnah bad ki samla pule jong ka dong ka thaiñ kin sngewthuh kham shai bad kin kiar na kaba ktah ne mat ïa ki jingdih ba pynbuaid kum u drok.
