Nongstoiñ, Jylliew, 27: La palat hynriew bnai ka por ka la ïaid naduh ba ka sorkar MDA I ka la wan ban plie ïa ka Rimuliang C& RD Block ha ka shnong Nonglang. Hynrei haduh mynta ka sorkar kam pat thung wat tang u chowkidar ne u nongap ïa katei ka ophis ban plie ban khang, ong u bah Francis Wanñiang uwei na ki riew rangbah na ka shnong Kyndonge kaba don ha katei ka thaiñ.
U bah Wanñiang haba ïakren bad u nongthoh khubor, u la ong ba naduh ba ka sorkar ka la pynbna ba ka thaiñ Muliang kan ïoh noh la ka jong ka Block ki paitbah ka thaiñ ki la kmen bha ban ki la kyrmen skhem ba ïa ki kam baroh kiba dei ban leh na ka Block ophis kum ki jingtrei shispah sngi, ki bai bam tymmen bad kiwei kiwei kim don kam shuh ban pynlut por ban leit haduh Riangdo.
Namar ka la don ha Nonglang, phewse ka jingwan plie ïa katei ka Block ophis ka dei pynban tang ka tamasa jong ka sorkar, ban pynbiej ïa ki paitbah ha shuwa ka Election, da kaba pyrkhat ba da ka jingai ïa ka Block, u kyrtong ka NPP na Rambrai Jyrngam un jop suk hynrei ka kylla pynban da khongpong.
U bah Wanñiang u la ong ruh ba haba ïaid lynti shuwa ban poi ha ka lynti ban kiew sha katei ka Block ophis, la ïohi kynreng ïa ka sign board ba la pynïeng harud surok, kaba kdew ïa ka krteng jong ka Rimuliang C& RD Block, hynrei lada leit donkam pat wat tang u nongplie ïa ka ophis ruh ym don.
Nalor kata u la ong ba haduh mynta ki tiar ki tar kum ki miej, ki shuki, ki bench, ki kor computer bad kiwei kiwei ki la don hynrei briew te ym don. U la ong ruh ba imat ka sorkar kam don pisa wat tang ban thung nong ap ha katei ka ophis ruh. Lymda kumta ban shu wan buh ophis khlem treikam ka long kabym don jingmut satia.
Nalor kata u la ong ba ha ka jingshisha ïa ka kam chowkidar, lada ka sorkar ka mon ban thung, ki don byllai ki nongshong shnong kiba kwah bad ïa kiwei pat ki nongtrei ka la dei ban thung la kumno kumno uwei ne ar ngut tang ba ki paitbah kiba leit donkam kin ym leit phai thylli sha ïing.
