Shah khrong 30 hajar kawei ka kali kit syiar, sha u DC ujor ki nongkhaïi syiar bad sengbhalang

Nongpoh, Nohprah 04: Ki nongshalan syiar ryngkat bad ki kynhun sengbhalang ba kynthup ïaka CoRP bad HITO Ri-Bhoi District mynta ka sngi kila leit ban ujor syndon sha u Deputy Commissioner ka Ri-Bhoi halor ka jingshah khrong ki kali kit syiar haduh 30 hajar kawei ka kali ban ioh rung sha ka jylla Meghalaya ba kum ki bor district ki dei ban shimkhia halor katei ka jingeh ki nongshalan syiar.
Haba kren sha ki lad pathai khubor naka liang u Bah Bandari Ryntathiang President ka CoRP, Banpynshai Umbah Working President HITO Umsning Circle, Rangkynsai Skhemiew uwei naki nongshalan syiar kila pynpaw ka jingsngewkhia kaba jur halor ka jingdon jong ki briew kiba khrong khajna haduh 30 hajar kawei ka kali kit syiar.
Kila pynpaw ruh ba kitei ki briew kiba dei hi naka jylla Meghalaya kiba la shim haduh 30 hajar kawei ka kali kit syiar bad kane kala wanrah ka jingeh kaba khraw ïaki nongshalan bad ki nongkhaïi syiar namar ba ki hap ban siew haka dor ba heh bad lada kim siew kim ioh satia ban rung shaka jylla ban pynpoi ïaki syiar.
Dei halor katei ka nongrim naka liang ki sengbhalang, bad kumjuh ruh ki nongshalan bad nongkhaïi syiar kila kyrpad ïaki bor district ba ki dei ban shimkhia ïa katei ka kam halor ka jingdon ki riew shim kabu kiba thmu ban kamai jem da kaba shu khrong pisa naki kali kit syiar kiba rung shaka jylla Meghalaya.