Shillong, Nohprah 04 : U Myntri Rangbah ka Jylla Conrad K Sangma mynta ka Lah Sngi U Blei ula pyntip ba ka Sorkar Pdeng ka la pynsangeh ban pyntreikam ïa ka Members of Parliament Local Area Development Scheme (MPLADS) ym tang ïa ka Tura Parliamentary constituency hynrei ha baroh kawei ka Ri naduh ka por jong ka khlam COVID.
Haba ïakren bad ki nongthoh khubor, u Conrad ula ong “Ha baroh kawei ka Ri ha ka por ba lyngshop ka ka khlam COVID ka Sorkar India ka la pynsangeh ïa ka jingtreikam ka MPLAD scheme. Kumta, kam dei satia tang ha Tura hynrei ha baroh kawei ka Ri ba ka MP skhim ka khlem treikam shuh bad ïa kane la leh da ka Sorkar NDA ba ïalam ka BJP bad namar kata, phi lah ban kylli ïa u President ka BJP halor kane bad nga tip ba u tip bha”.
U President ka Meghalaya BJP Rikman G Momin ula kynnoh ba ka MP ka Tura Agatha K Sangma kam shym la lah ban pyntreikam ïa ka MP skhim ha Ri-lum Garo.
U Myntri Rangbah ula kam ba ka MP ka Tura ka la shim ïa ka bynta kaba khraw bha haba ïadei bad ka jingpyntreikam ïa ki skhim ka Sorkar Pdeng ha Jylla.
“Nalor ka MP skhim phi dei ban sngewthuh ba ka kamram jong ka MP ka long ruh ban khmih ïa bun ki skhim ka Sorkar Pdeng. Mynta ka ka MP jong ngi ka la shim ïa ka bynta kaba khraw bha la ka dei ha ka jingpyntreikam ïa ka PMGSY, ka dei da ka jingai jingmut jong ka bad jingbuddien ba kane ka prokram bad ka skhim ka la jam shakhmat bad dei ruh ïa ka jingpeit pyrman jong nga ba ki kam ki la ïaid shaid shaid” ong u Conrad.
“Ka la leh ïa shibun kiei kiei halor ki prokam bapher bapher bad ha ka Jal Jeevan ruh baroh ki jingkyrshan ba ngi ïoh na ka Sorkar Pdeng khamtam ha Ri-lum Garo ka la wan na ka MP khamtam haba ngi donkam ban leit ïakren ïa ki Myntri Sorkar ne ka Sorkar pdeng ban pan jingïarap” ula ong.
