Shillong, Nohprah 04: U President jong ka Voice of the People Party (VPP) u Bah Ardent Miller Basaïawmoit, u la ther tyngeh ïa kiti kiba la beiñ ïa ka Seng halor ka jingïakhih ban pynkylla ïa ka Reservation Policy.
Haba kren ha ki jingïalang jong ka Seng ha kine ki khyndiat sngi baladep na ka bynta ban pynshai ïa ka nongrim treikam bad ki mat treikam jong ka Seng bad ruh ka jingpynrung dkhot, u Bah Ardent u la ong ba ki la don katto katne kiba la kynthoih ha ki Social Media kiba la ong ba ka jingïakhih jong ka VPP halor ka Reservation Policy ka long ka jingma ïa ka jaidbynriew bad kane ka jingïakhih kam shym la poi shano shano. Ki la kynthoh ruh ba kan poi ka por ba ki paidbah kin sa thang ïa ka dur tyngshop jong u Bah Ardent namar ba u la ïalam bakla ïa ki paidbah.
“Ha kine ki sngi imat ki don ki briew kumba ju don ba ong, ‘ha ka bieit ha ka shlur’, khlem da tip kumno ka jingïakhih ka sdang bad khlem da tip shano ka la poi ki la shu kynthoh kulmar”, u la ong.
U MLA ka Nongkrem, u la ong ba ka sorkar ka dang thung ïa ka Expert Committee dang ha u bnai Nailar mynta ka snem bad ki dkhot jong kane ka Committee ki dang sdang ban treikam, hynrei ki la mih ki jingkynthoh kiba khlem nongrim bad khlem da tip ïa ka kam. “Ngim dei ki khynnah ba ngin shu leit kylli man ka por na u Myntri Rangbah shano ka jingpynbeit thymmai ïa ka Reservation Policy ka la poi”, u la ong.
U la ïathuh ba ka Seng ka la ïakynduh ïa u Myntri Rangbah halor ka jingtreikam ka Expert Committee ba la thung ban peit ban pynbha ïa kane ka Polisi bhah kam. U Myntri Rangbah u la ong ba ka sorkar ka la ai por shi snem ïa kane ka Expert Committee ba kan pyndep ïa ka kam, hynrei na ka liang ka Seng ka la ong ba shisnem ka por ka la slem palat bad ong ba la kumno kumno dei ban pyndep noh hapoh hynriew bnai. “Ka Seng ka tip la ka jong ka kamram ban trei bad kam dei ba ka ïalam bakla kumba la kynthoh”, u la ong.
Lah ban kdew hangne ruh ba dang shen ha ka jingleit buddien da ka KHNAM na u Chief Secretary ka jylla, u Bah DP Wahlang halor ka jingtreikam ka Expert Committee, u Chief Secretary u la ïathuh ba kane ka Committee ka ladep shong jingïalang shisien lyngba ka Online bad kan shong biang ha ka 6 tarik mynta u bnai.
Lah ban kdew hangne ba ka VPP ka la pynlong ïa ka jingïakhih ha kine ki bnai baladep, ha kaba u Bah Ardent u la shah thngan haduh 221 kynta ne 9 sngi tam tad haduh ba ka sorkar ka la rai ban thung da ka Expert Committee ban peit bniah ïa kane ka kam bad u Chairman jong kane ka Committee udei u Nongbishar ba la shongthait jong ka Supreme Court jong ka ri India.
