Shillong, Nohprah 04 : U Myntri Rangbah ka jylla, Conrad K Sangma ha ka sngi Nyngkong u la ong ba lada wan ki rel kit mar ha ka jylla kan pynmyntoi shibun ïa ki nongrep jong ka Meghalaya.
Haba kren bad ki lad pathai khubor hadien ka jingïalang jong ki nongrep ha State Convention Centre, u Myntri Rangbah u la ong ba ka sorkar jylla ka dang ïa syllok bad ka sorkar pdeng haba ïadei bad katei ka bynta bad ruh bad ki padibah. U la pynti ruh ba haduh mynta ka dang don ka jingpyneh bad dei na kata ka daw ka sorkar kam pat lah ban phah ïa ka jingtyrwa ban wanrah noh ïa ki rel kit mar.
“Ki rel kit mar khlem artatien kin long ka jingïarap kaba khraw bha, kan ïarap ïa ki nongrep bad ka imlang sahlang hi baroh hynrei haduh mynta bun kim pat pdiang,” u la ong.
Shuh shuh u la ong ruh ba ka sorkar ka kwah ban ïaid da ka lynti kaba dei bad pynshai ïa ki paidbah namar kam kwah ban shu thom da ka bor.
“Naduh kaba sdang nga la kren da kaba shai ba katba ym pat lah ban pynbeit ïa kitei ki jingpyrshah jong ki paidbah ngin ym leh satia da ka bor. Hooid watla ka long kaba donkam ban wanrah ïa ki kam pynroi hynrei kadei pat ban long ka kam pynroi kaba da pdiang da ki paidbah. Dei na kane ka daw ba ngi kwah ban ïa syllok shwa bad ki paidbah bad ngin peit mynta kumno kane ka kam kan ïaid shakhmat,” bynrap biang u Myntri Rangbah.
Da kaba ong ruh ba ïa kane ka sngi kadei kaba la buh kyrpang na bynta ki nongrep ka jylla, u Myntri Rangbah u la ba katei ka jingkynduh kadei eh ban ai ka jingithuh kaba kyrpang, ka jingpynshlur bad ka jingkyrshan ïa ki bad plie lad ïa ki ha ki mishon bapher bapher, ki lad ai jinghikai bad ki kor ki bor katkum ka juk mynta.
Shuh shuh u ong ruh ba kane kadei ka kabu ksiar na bynta ki nongrep ba kin wanrah bad kdew ïa ki jingeh ba ki kynduh bad ruh ba kin ïatai khnang ba ka jingmyntoi kan dei na bynta jong ki.
Halor ka jingkylli la ka sorkar ka don jingthmu neem ban buh khambun ki regulated market, u Myntri Rangbah u la ong ba nalor ki regulated martket ki don ruh bun ki iew nongrep namar ka sorkar ka la buh ïa kitei ki iew ha kylleng ki jaka da kaba ailad ïa ki nongrep ba kin don ïa ki synjuk bad pynïaid hi ïa kitei ki iew khnang ba yn ym don mano mano ruh ban shim kabu.
Na ka liang ka Myntri ka tnad ka Rep ka Riang, Kong Ampareen Lyngdoh pat ka la ong ba ka rukom long ka iew ka hat ha kane ka juk mynta ka la kylla baklybak. Ka ong ruh ba lada phai sha ki regulated market ne ki iew die lang, bunsien la buh ïa ki mar rep kiba lah ban duh noh tang shiteng por hynrei mynta pat ka sorkare ka plie ka lad ba ki nongrep kin ïoh ban shalan wat sha ki iew bar ri.
