Lada kam urlong kumba la kular, da ka PIL byrngem ka FKJGP pyrshah ïa ka NHIDCL
Mawkyrwat, Nohprah 04: Ka Federation of Khasi Jaiñtia & Garo People’s (FKJGP) South West Khasi Hills District mynta ka sngi ka 4 tarik u Nohprah, 2023 Meghalaya ka pynpaw ka jingaikhublei ïa ka Joint Inspection kaba la jurip ïa ka surok na naduh shilliang jong ka Jingkieng Borbasing haduh ka lad Alikwareng ba la lamkhmat da u bah Prestone Tynsong u Symbud Myntri Rangbah bad kum u Myntri ba dei peit ïa ka tnad surok ka Jylla Meghalaya.
Haba kren ha ki lad pathai khubor ha ka Press Conference kaba la pynlong mynta ka sngi hapoh ka ophis treikam jong ka FKJGP, South West Khasi Hills District, u bah D.K. Nonglait, President ka FKJGP South West Khasi Hills District, u la pynpaw ka jingkhublei ba kyrpang ïa u bah Prestone Tynsong uba la shimkhia ban jurip ïa ka surok na shilliang Jingkieng Borbasing haduh ka lad Alikwareng kaba la pyntrei da ka National Highways & Infrastructure Development Corporation Limited (NHIDCL) ym ka dur jong ka Two Lane hynrei da ka Intermediate Lane bad kane kam shym la long katkum ka jingmang.
Kumta u la pynpaw ba ha ka jingjurip jong u Prestone Tynsong ryngkat u bah Tableland Lyngwa, IAS, Deputy Commissioner, South West Khasi Hills District, Mawkyrwat, u bah Pius Marweiñ, MLA/MDC ka Ranikor Constituency lem bad ki ophisar jong ka PWD (Roads) ki la kubur ba ka jingpyntrei ïa kane ka surok kam ïa hap katkum ka two lane kaba la dep ban pyntrei ha ki bynta kiba kham shakhmat. Namarkata u bah Nonglait u la buh ka jingkyntu ïa ka NHIDCL ba ka dei ban pyntrei katkum ka jingbhah ne pyntrei beit da ka surok bah (Two Lane) namar katkum ka jingïoh jingtip ba ïa ki jaka ne jingsiew ïa ka land compensation la dep ban ïoh naduh u snem 1973 kaba long 100 phut kata 60 phut sha jrong bad 40 ha ki bynta ba hapoh.
“Lada kane ka jingjurip bad ki jingkren kim urlong kumba u bah Prestone Tynsong u la kren ha ki lad pathai khubor bad pynsngew ruh ha ka NHIDCL, na ka liang ka FKJGP ruh kan nym shong kli kti hynrei kan sa bud dien bad wat ban leh da ka PIL ruh”, ong u bah D.K. Nonglait, President ka FKJGP South West Khasi Hills District.
Ha ka sngi la synran lang ruh da ki katto katne ki dkhot bad ki nongkitkam jong ka FKJGP South West Khasi Hills District.