Donkam ban hikai pyntbit ïa ki bor pulit ba kin lah pynneh ïa ka shongsuk shongsaiñ : Dy CM
Shillong, Nohprah 04: U Symbud Myntri Rangbah ka jylla u bah Prestone Tynsong u la ong ba ka long kaba kongsan ba ki pulit kin ïoh ïa ki jnghikai pyntbit khnang ba kin lah ban pynneh ïaka shongsuk shongsaiñ.Ia kane u la kren mynta ka Lah Sngi U Blei ha North Eastern Police Academy (NEPA) Ri Bhoi District, haba plie ïa ka 53rd Basic Course jong ki pulit Deputy Superintendent of Police bad Sub Inspectors .
Ula ong ba u dap da ka jingsngewsih ban ïohi ba ki bor pulit kin shah kynthoh wat haba ki trei shitom ïa ka kamram kaba la bynshet ha ki bad ki la buh shwa sharud ïa la ka ïing ka sem tang na ka bynta ban shakri ïa ka ri. Ula ai mynsiem ïa ki ophisar kiba don hapoh ka jaka shah hikai ba kim dei ban duh jingkyrmen hynrei ba kin bteng ban trei shitom ha kaba shakri ïa ka jylla bad ka ri.
Nalor kane, ula kyntu ruh ïa kine ki ophisar ba ki dei ban long kiba don akor bad ba kin kyntiew ruh ïa ka bor jong ka jingmut jingpyrkhat bad ba kin leh bha ha kane ka jingshah pyntbit ka jongki.
U Symbud Myntri Rangbah ula ïaroh ruh ïa ka NEPA khamtam haba dang shen kala ïoh ia ka jingithuh “UTKRISHT” na ka CBC bad NABET bad ula ïaroh ruh ïa u Director jongka Academy bad ïa baroh kiba trei ha kane ka Academy.
Ula banjur ïa ka jingdonkam ban tip bha ïa ka aiñ ka kanun bad kumjuh ruh ban don ka jingïadei kaba ïajan bad ki paidbah ha ka kam shakri paidbah bad ula ai mynsiem ïa kine ki samla ba kin sdang nalade ban wanrah ïa ka jingkylla bad ban ïoh ruh ïa ka jinghikai na ka Academy kaba long kaba bha tam hapoh ka ri.
Ha katei ka jingïalang la ïadon lang u Director General of Police ka Meghalaya u Dr L.R. Bishnoi, u Director jongka NEPA u Anurag Agarwal, ki heh pulit bad ki heh ophisar sorkar bad kiwei kiwei.
U Anurag Agarwal ula ai mynsiem ïa ki samla kiba ïoh jinghikai ba kin trei shitom ba kin long ki pulirt ophisar kiba tbit ha ka ban shakri ïa ka ri.
Katba u Course Director jong ka 53rd Basic Course Dr. M.L Zou Assistant Director (Lecturer) ula ai ka jingbatai shaphang kane ka kynhun ka ban ïoh jinghikai kaba long baroh 95 ngut kaba kynthup na Meghalaya SI=39, DySP=06, Manipur SI=08, DySP=14, Assam SI=15 bad Nagaland SI=04, DySP=09.
Kitei ki ban ïoh jinghikai ki kynthup 26 ngut ki kynthei bad 69 ngut ki shynrang.