Shillong, Dec 4: Ka jylla Meghalaya mynta ka Lah Sngi U Blei ka la pynlong ïa ka Meghalaya Farmers’ Parliament kaba Lai ha State Convention Centre, da ka jingthmu ban rakhe bad ban ithuh ïa ka jingtrei shitom jong ki nongrep.
Katei ka jingïalang kaba ar sngi kan long kum ka rynsan na ka bynta ki nongrep ba kin ïakren halor kiba bun ki mat, ban shim ïa ki sienjam ban kyntiew ïa ka rep ka riang da kaba bud ruh ïa ki rukom rep tynrai, ban ïathuh shaphang ki khana jop jong ki nongrep da ka jingthmu ban ai mynsiem ïa ki nongrep ba kin lah ban trei bad pynmih kham bun ïa ki mar rep.
Haba kren ha ka jingïalang u Myntri Rangbah ka jylla u Conrad Sangma ula ong, ba ka Farmers’ Parliament ka long ban ithuh ïa ki kam jong ki nongrep bad ban kyrshan ïa ki bad ban pynsaphriang ïa ki kyrwoh khubor ba ka sorkar ka don ryngkat bad ki khnang ba kin lah ban pynbha ïa ka rukom im ka jongki da kaba rep ba riang.
Ula ong ba ki nongrep ki dei kiba la don lypa ha ki kam rep kam riang hynrei tang katto katne eh ki donkam ïa ka jingkyrshan kum ka jaka buh ïa ki mar rep, ka jingpynkit, ka jingbei tyngka bad ki polisi treikam ban pynlong ïa ka rep ka riang ka ban biang bad ban bha ka kamai kajih.
U Myntri Rangbah ula ong ba ka Regeneration Meghalaya Program, ka dei kaba ula plie ka dei shi bynta jong ka jingthmu bad ka thong kaba ïar.
“Lyngba katei bad kiwei kiwei ki program kiba ïasyriem jong ki tnad sorkar bapher ka Meghalaya ki la sdang bad ki la ïaid shakhmat mynta ban pyni ïa ka lynti” ong u Conrad.
Ula ong ba ka long kaba donkam ban mad bad ban shimkhia ïa ki jingeh kiba don ha ka liang ka rep ka riang.
“Haba ngi ïaid shakhmat, ngi la nang tip lyngba ki jingbakla bad na ki jingeh kaba ngi mad bad ngim lah ban kyntait ïa ka jingshisha bad ki don bun bah kiba don bynta bad kiba bun jait ki kam kiba jia ha kylleng ki jaka hynrei ngi hap ban wanrah lang ïa kine shi jaka bad ban ïaid lang ha ka program kaba kyrpang da kaba buh hakhmat ïa ka thong kaba ngi don” ong u Myntri Rangbah.
Ula ong, ruh ba kano kano ka program ba kan long kaba seisoh, ka imlang sahlang ka dei ban don bynta lang, ki ban pynïaid shakhmat ïa ka program bad ban pynthikna ba ka program kan long kaba neh ba sah bad ka ban ïaid shakhmat bad ula kyntu ruh ïa ki ban don bynta ha ka Regeneration Meghalaya Project ban wanrah ïa ka jingïadei bad ka imlang sahlang bad ha ki shnong ki thaw khnang ba ka program kan long kaba seisoh bad kaba jop.
“Ha kane ka sngi jong ki nongrep, ngi ithuh bad ai burom ïa ka jingnoh synniang kaba khraw jong ki 4.5 lak tylli ki longïing ha ka rep ka riang kiba la kyntiew ïa ka jylla” la pynkut u Myntri Rangbah.
U Myntri Rangbah ula sam ruh ia ki ‘cheques’ FOCUS bad PES sha ki nongïoh jingmyntoi bad kumjuh ruh ïa ki nongïoh jingmyntoi lyngba ka Piggery Mission.
Kum shi bynta jong ka Meghalaya Farmers’ Day, u Conrad ula plie ïa ki 11 tylli ki Processing Facilities bad 4 tylli ki Cold Storage.
